Ҳүрметли Президентимиз Қарақалпақстан Республикасына болған сапарында «Сизлер менен бирге үлкен ҳәрекет басладық. Ҳәр бир аймақтың дәртин билейик, ҳәр бир инсанның ишине кирейик, ертеңги күнге исенимин оятайық деп терең реформаларды әмелге асырып атырмыз. Адамлар ертең емес, алыс келешекте емес, бүгин жақсы жасаўы керек» - деп, халқымыздың турмысында ушырасып атырған машқалаларға шешим табыў, олардың бүгинги күнинен разылығын тәмийинлеў ҳәр бир басшының мойнына жүклетилген жоқары ўазыйпа екенлигин атап өткен еди. Усы тийкарда ҳүрметли Президентимиз басламасы менен барлық орынларда халықтың дәрт ҳәм тәшўишлерин жеңиллетиў бойынша жумыслар әмелде даўам еттирилмекте. Республикамыздың алыс аймақларында жасаўшы пуқараларды ишимлик суўы менен тәмийинлеў, олардың күнделикли турмысында пайдаланыўы ушын суў жеткерип берилиўин жолға қойыў да усы тийкардағы жумыслардан болып, тайнапыр бурғылаўшы техникалар жәрдеминде артезиан қудықларын қазыў жумыслары Тахтакөпир районының алыс Белтаў АПЖ аймағынан басланған еди. Ҳәзирги ўақытта аўыл пуқаралар жыйыны аймағынан үлкен көлемдеги артезиан қудықлары қазылып, 500-600 мт тереңликтен суў шығарыўға ерисилди.

Сондай-ақ, аймақта жаңа егислик жерлерин ашыў мақсетинде 2000 геклар жер майданы таярланып атыр. Бул ушын зәрүрли барлық техникалар мобилизация етилген. Соның менен бирге, усы егислик майданларына тамшылатып суўғарыў жолы менен суў жеткерип берилиўин тәмийинлеў мақсетинде 12 орында жасалма суў сақлаўшы бассейнлерди қазыў жумыслары да қызғын пәтте даўам етпекте.

Бул ийгиликли жумыслар бүгинги күнниң өзинде өз нәтийжесин көрсетпекте. Яғный, Белтаў АПЖ аймағына өмир қайтып, қаңырап қалған жап-салмалар мәўижленген суўға толып ағып атыр. Тиришилик дерегиниң Белтаў етегиндеги жер майданларына қайта өмир бағышлаўы адамлардың жайнаған жүзинде де өз сәўлесин таппақта. Жасы үлкенлердиң ҳәр бир пәтиясында айтылатуғын «Суў мол болғай» деген тилеги бүгин Президентимиз басшылығында реал турмысқа көшип, аймақ турғынларының қуўанышысына себеп болмақта. Алдын «суў қашан келеди» деген сораўлы бағыс қылатуғын пуқаралардың көзинде бүгин ҳүрметли Президентимизге, ел басшыларына миннетдаршылық сезимлери көринеди.

Өз нәўбетинде таярланып атырған егислик майданларда бағ жаратыў ҳәм аўыл хожалығы егинлерин егиў режелестирилген. Буның нәтийжесинде аймақ турғынлары, жергиликли пуқаралар ушын жаңа жумыс орынлары жаратылады. Ең баслысы, адамлардың шаңарағына дәрамат кирип, турмыс абаданлығы артады. Халық ийгилиги жолында әмелге асырылып атырған бул жумыслар әлбетте өз нәтийжесин берери сөзсиз ҳәм бул, бүгинниң өзинде турмыста өз сәўлесин таўып үлгермекте. Халқымызға мүнәсип турмыс шараятын жаратыў бойынша жумыслар еле де қызғын пәтте даўам еттириледи.

Қарақалпақстан Республикасы Жоқарғы Кеңесиниң Мәлимлеме хызмети