Шоманайлы 3 жас шаңарақтың неке тойы ҳәм 20 баланың сүннет тойы өткерип берилди

Президентимиздиң басламасы менен елимизде кем тәмийинленген, социаллық қоллап-қуўатлаўға мүтәж ҳәм майыплығы болған пуқаралары бар шаңарақларды қоллап-қуўатлаў, оларға ҳәр тәреплеме ғамхорлық көрсетиў, социаллық жәрдем бериў бағдарында кең көлемли илажлар әмелге асырылмақта. Жақынласып қалған мүбәрек Рамазан айы алдынан халықтың жәрдемге мүтәж қатламына жәрдем бериў сыяқлы қайырқомлық ҳәм саўаплы ислерди әмелге асырыў халқымызға тән ағла пазыйлетлерден есапланады. Бүгин Шоманай районындағы 3 жас шаңарақтың неке тойы ҳәм 20 шаңарақ балаларының сүннет тойының салтанатлы мәресими өткерип берилди. Илажда Қарақалпақстан Республикасы Жоқарғы Кеңесиниң Баслығы Аманбай Орынбаев шығып сөйлеп, жыйналғанларды той мәресими өткерилиўи, сондай-ақ, елимизде кең түрде даўам етип атырған Наўрыз салтанаты ҳәм кирип киятырған мүбәрек Рамазан айы мүнәсибети менен қызғын қутлықлады.

Онда Шоманай район ҳәкими Б.Янгибаев ҳәм Шоманай Экотекс кәрханасы баслығы Ш.Базаровлар қатнасты. Салтанатлы түрде өткерилген той мәресиминде той қахарманларына Ҳүрметли Президентимиздиң саўғалары  тапсырылды. Қәўендерлер тәрепинен өткерилип атырған той салтанаты қарақалпақ эстрада қосықшыларыниң концерт бағдарламасы менен даўам етти.

Қарақалпақстан Республикасы Жоқарғы Кеңесиниң Мәлимлеме хызмети