Қарақалпақстандағы 452 мәҳәллениң ҳәр бирине 500 миллион сумнан қосымша қаржы ажыратылады

Мәмлекетимиз басшысы Қарақалпақстан мәҳәллелерин абат етиў, суў, жол, электр тәмийнатын жақсылаў, мектеп, бақша ҳәм медицина пунктлерин қурыў ҳәм оңлаў ушын 2023-жылда 1,5 триллион сум берилип атырганлығын атап өтти. Буннан тысқары, 452 мәҳәлледеги шараяты аўыр 21 мың үй оңланады, 709 үй жаңадан қурып бериледи. Буған бюджеттен 132 миллиард сум, Ташкент қаласы ҳәм ўәлаятлардан 232 миллиард сум ажыратылып атыр. Президент Қарақалпақстан халқы абаданлығын еле де арттырыўға қаратылган 3 жаңа басламаны айтып өтти. «Қарақалпақстандағы 452 мәҳәллениң ҳәр бирине туўрыдан-туўры 500 миллион сумнан қосымша қаржы ажыратылады. Буның ушын өз алдына Қарақалпақстан мәҳәллелерин қоллап-қуўатлаў фонды шөлкемлестирилип, оған быйылғы жылда 250 миллиард сум ажыратамыз. Машқаланы мәҳәллениң өзи көтерсин, өзине пул берейик, өзи қадағаласын. Сонда сапа ҳәм мәпдарлық болады. Адамлар разы болады», — деди Шавкат Мирзиёев. Президент өзине аймақлардан үй-жайлар кадастри мәселесинде оғада көп мүрәжатлар болыўын айтты. «Қарақалпақстанда да 47 мың үй-жай ҳәм көшпес мүлклердиң кадастри жоқ. Бул – адамларымызды ипотека алыў, қыйтақ жеринде дийқаншылыққа кредит, субсидия алыў, жасап атырған баспанасын перзентлерине мийрас қалдырыў имканиятын шеклеп атыр. Көп ойлап, Қарақалпақстан халқына усы мәселеде жеңиллик жаратпақшыман», — деди мәмлекет басшысы. Президент Жоқарғы Кеңес Баслығына еки айда 38 мың адамның қолына кадастрин толық ислеп бериў бойынша тапсырма берди. Мәмлекет басшысы өз сөзинде даўам етер екен, Қарақалпақстанда жылына 6,5-7 мың үй-жайға талап бар екенлигин айрықша атап өтти. «Сонлықтан, 2023-жыл өткен жылға салыстырғанда 2 есеге көп яки 4 мың үй-жай қурылады. Буған қосымша етип, тек ғана Қарақалпақстан халқы ушын жаңа имканият жаратамыз. Яғный, заманагөй жойбар тийкарында 4 мың жеке тәртиптеги үй-жай қурыўға 4 сотихтан жер ажыратылады. Инфраструктураны да ислеп беремиз. Бундай имканиятты басқа аймақларымызға бермегенбиз», — деди Президент.