Қарақалпақстан Республикасы Конституциясының қабыл етилгенлигиниң 30 жыллығы мүнәсибети менен Қарақалпақ мәмлекетлик университетинде салтанатлы илаж өткерилди

Бердақ атындағы Қарақалпақ мәмлекетлик университетинде Қарақалпақстан Республикасы Конституциясының қабыл етилгенлигиниң 30 жыллығы мүнәсибети менен илаж болып өтти. Онда Қарақалпақстан Республикасы Жоқарғы Кеңесиниң Нызамшылық, суд-ҳуқық ҳәм коррупцияға қарсы гүресиў комитети баслығы З.Реймова, Қарақалпақстан Республикасы суды баслығы К.Тарихов, Қарақалпақстан Республикасы прокурорының аға жәрдемшиси Д.Елмуратов ҳәм университеттиң профессор-оқытыўшылары,  студент-жаслар қатнасты. Өткерилген илаж Өзбекстан ҳәм Қарақалпақстан Республикаларының мәмлекетлик гимнлери менен басланды. Онда Қарақалпақстан Республикасы Жоқарғы Кеңесиниң Нызамлылық, суд-ҳуқық ҳәм коррупцияға қарсы гүресиў мәселелери комитети баслығы З.Реймова шығып сөйлеп, жыйналғанларды сәне мүнәсибети менен қызғын қутлықлады. Соның менен бирге, халқымыздың турмыс абаданлығын арттырыў, олардың нызамлы мәплерин, хуқық ҳәм еркинликлерин тәмийинлеўде – Конституцияның орны ҳәм әҳмийети жоқары екенлигин атап өтти. Конституция мәмлекеттиң тийкарғы нызамы болып, ҳәр бир инсанның нызамлы мәплери усы ҳүжжетте өз сәўлелениўин табады. Бүгин елимизде жүз берип атырған жаңаланыўлар, демократиялық ҳуқықый мәмлекет тийкарларын беккемлеў, әдил пуқаралық жәмийетин қәлиплестириў жолында ерисип атырған жетискенликлеримиздиң барлығы Конституцияда көрсетилген тийкарғы принциплердиң турмысқа толық енгизилиўи менен байланыслы. Өткерилген илажда конституциямыздың турмысымызда тутқан орны, оның әҳмийети, пуқараларымыздың ҳуқық ҳәм еркинликлерин тәмийинлеўдиң тийкары екенлиги атап өтилди.

Қарақалпақстан Республикасы Жоқарғы Кеңесиниң Мәлимлеме хызмети