Устазлардың уллы жолы издеги шәкиртлерге барқулла үлги аларлық мектеп болады

Бүгин Нөкис қаласында жайласқан зәўлим имаратта Мәденият ҳəм көркем өнер хызметкерлериниң үш әўлады дийдарласты. Ушырасыў кешесинде дәслеп узақ жыллар даўамында елимиз ҳәм халқымыз ушын пидайы мийнет еткен нураныйлар қатар дизилген жаслар тәрепинен ҳүрмет-иззет көрсетилип күтип алынды. Өз нәўбетинде нураныйлар жаслар менен ушырасып, олардың йошланып жырлап атырған қосықлары, атқарған намаларынан толқынланып, өзлериниң жаслық шағларын еследи. Дийдар несип ушырасыўда Қарақалпақстан Республикасы Жоқарғы Кеңесиниң Баслығы Аманбай Орынбаев, Өзбекстан Республикасы Президентиниң кеңесгөйи Т.Худайбергенов шығып сөйлеп, елимиздиӊ раўажланыўына мүнәсип үлесин қосып киятырған бир топар ветеранлар ҳәм тараў ўәкиллериниӊ үлгили ислерин айрықша тилге алды.

Онда Қарақалпақстан Республикасы Министрлер Кеңесиниң Баслығы Ф.Эрманов ҳәм республикамыздың барлық район ҳәм қалаларынан келген узақ жыллар даўамында хызмет көрсеткен мәденият ҳәм көркем өнер хызметкерлери болған кекселер, ветеранлар, студент жаслар қатнасты. Өткерилген ушырасыўда халқымыздың мәденияты ҳәм көркем-өнер тараўы раўажланыўында өзиниң салмақлы үлесин қосқан марҳум тараў дарғалары, устаз қосықшылар, атақлы артистлер, тараўдың белгили ўәкиллери яд етилди.

  Мийнеткеш халқымыз Ибрайым Юсупов, Игор Савицкий сыяқлы уллы инсанлардың өлмес дөретпелери, Айымхан Шамуратова, Байрам Матчанов киби хош ҳаўаз бүлбиллердиң жаңлар ҳаўазын, басқа да бир қатар устаз көркем өнер ғайраткерлериниң мийрасын мәңги ядында сақлайды. Ушырасыўда узақ жыллар даўамында елимиз ҳәм халқымыз ушын пидайы мийнет еткен тараў пидайыларының, тәжирийбели нураныйлары, ақыл-кеңес берер жасы үлкенлери жыйналды.

  Сонлықтан, өткерилип атырған бул үш әўлад ушырасыўының шөлкемлестирилиўинде үлкен мәнис-мазмун бар. Жасы үлкен әўлад ўәкиллери жаслар менен пикир алысып, жаслық күш-ғайратын қайта сезингендей болды десек алжаспаған боламыз. Нураныйлардыӊ үгит-нәсиятлары жасларды жақсы инсан болып жетилисиўине, ҳәр дайым жақсылық ислеўге, тереӊ билим алыўға, мәдениятымыз ҳәм көркем-өнеримиздиң раўажланыўына мүнәсип үлес қосыўға бағдарлайды.

  Дийдарласыў ушырасыўы даўамында концерт бағдарламасы, елимиз, халқымыз ушын пидайы мийнет еткен қаҳарманлардыӊ бай турмыс тәжирийбеси, үлгили мийнет жолы ҳаққында арнаўлы фильмлер жыйналғанлар нәзерине усынылды. Әлбетте, бундай илажлар жаслардыӊ ҳәр тәреплеме жетик инсан болып жетилисиўине, мийнет нураныйларыныӊ турмыс мектеби менен жақыннан таныс болыўына хызмет етеди.

 

Қарақалпақстан Республикасы Жоқарғы Кеңесиниң Мәлимлеме хызмети