Жоқарғы Кеңес Баслығы Аманбай Орынбаев Нөкис қаласының ең шетки аймақларынан бири болған Қаратаў мәкан пуқаралар жыйыны пуқаралары менен ушырасты

«Insan qádiri ushın» principi tiykarında ámeliy jumıslar búgingi kúnniń baslı maqsetine aylanıp úlgergen. Usı tiykarda respublikamız aymaǵında da bir qansha jumıslar alıp barılıp, bul baǵdarda alıs, shetki aymaqlar turǵınları da itibardan shette qalmay atır. Qaraqalpaqstan Respublikası Joqarǵı Keńesiniń Baslıǵı Amanbay Orınbaev 2022-jıldıń dekabr ayında Qarataw awılı puqaraları menen ushırasqan edi. Búgin Joqarǵı Keńes Baslıǵı bolıp ótken ushırasıwda bildirilgen múrájatlardıń sheshimi hám juwapkerlerge berilgen tapsırmalardıń nátiyjesin kóriw ushın Nókis qalasına qaraslı oraydan derlik 90 km qashıqlıqta jaylasqan Qarataw mákan puqaraları jıyınına bardı hám aymaqta puqaralar menen kórisip, jaqınnan sáwbetlesti.

Aytıp ótiw kerek, Joqarǵı Keńes Baslıǵınıń aldınǵı ushırasıwında bildirilgen bir qatar máseleler óz sheshimin tapqan. Sonnan, Berdibaev Igiliktiń kómir sapası boyınsha múrajatı tiykarında “Kómir táminat” JShJ Qaraqalpaqstan Respublikası filialına qaraslı “Nókis kómir qoymaxanası” tárepinen “Qarataw” APJ aymaǵına sapalı kómir jetkizip berildi. Izimov Baktıbaydıń toǵay xojalıǵı komiteti tárepinen quwraǵan aǵashlardı puqaralarǵa otın sıpatında paydalanıw ushın shıǵarıp beriwde járdem soraǵan máselesi unamlı sheshilip, Ózbekstan Respublikası Ministrler Kabinetiniń 2015-jıl 30-sentyabrdegi 278-sanlı qararınıń qosımshasında Nızamshılıqta belgilengen tártipte yuridikalıq hám fizikalıq shaxslarǵa bazalıq esaplaw muǵdarınıń 0,4 koeffecenti tiykarında otın satıp alıw imkaniyatı bar ekenligi túsinidirilip, Izimov Baqtıbay toǵay xojalıǵı komiteti tárepinen biyǵarez tártipte otın menen támiyinlendi.

Aymaq turǵınlarınıń qıytaq jerlerin aǵın suw menen támiyinlewshi salmalardı qazıp, tazalap beriw boyınsha máselesi de Qaraqalpaqstan Respublikası Prokuroturası basshılıǵında sheshimin taptı. Kudaybergenov Mambetniyazdıń  aymaqtaǵı 14-sanlı ulıwma orta bilim beriw mektebine jańadan transformator ornatıp beriw boyınsha múrájatı tiykarında eski transformator punkti 160 kVA quwatlılıqtaǵı transformatorǵa almastırılıp tolıq elektr energiyası menen támiyinlendi. Turkmenbaev Sırajaddinniń aymaǵında jańadan salınıp atırǵan úlgili joybardaǵı turaq jay boyınsha kelispewshilikler sebepli bildirgen múrajatı unamlı sheship berildi. Joqarǵı Keńes Baslıǵı hár bir bildirilgen múrájattı óziniń jeke qadaǵalawına alıp, sheshimin tabıw ilajların kórip atır. Barlıq ámelge asırılıp atırǵan jumıslardan gózlengen tiykarǵı maqset – insanlardıń búgingi turmısınan razılıǵın támiyinlew, olardıń jasaw sharayatın jaqsılaw bolıp tabıladı hám usı tiykardaǵı jumıslar ele de dawam ettiriledi.  

Qaraqalpaqstan Respublikası Joqarǵı Keńesiniń Málimleme xızmeti