Қарақалпақстан Республикасы Жоқарғы Кеңесиниң Баслығы Аманбай Орынбаев қайта тиклениўши энергия дәреклеринен пайдаланыўды ен жайдырыў, электр энергиясынан үнемлеп нәтийжели пайдаланыў, қурылыс, социаллық ҳәм басқа да бир қатар объектлерди көмир жанылғысынан пайдаланыўға өткериў сыяқлы әҳмийетли мәселелерге арналған видеоселектор мәжилисин өткерди. Онда Қарақалпақстан Республикасы Министрлер Кеңесиниң Баслығы Ф.Эрманов қатнасты.

Ҳүрметли Президентимиздиң 2023-жыл 16-февральдағы 57-санлы қарары тийкарында социаллық ҳәм үй-жай коммунал хызмет көрсетиў тараўында ҳәмде экономикалық тармақларда қайта тиклениўши энергия дереклерин кеңнен енгизиў, энергия нәтийжелилигин арттырыў арқалы энергия жетиспеўшилигин қаплаў мақсетинде социаллық объектлер, исбилерменлик субъектлердиң имаратлары ҳәм пуқаралардың турақ-жайларында қуяш панеллери ҳәм қуяш суў ысытқышларын орнатыўды ен жайдырыў белгиленген. Усы тийкарда бүгинги күнде республикамыздағы бир қатар объектлерде қайта тиклениўши энергия дереклерин орнатыў жумыслары басланған еди. Қайта тиклениўши энергия дереклерин пайдаланыўды ен жайдырыў бойынша бир қатар жеңилликлер, қолайлықлар берилмекте. Усыған қарамай, бүгинги күнде социаллық тараў ҳәм мәмлекетлик уйымларында қуяш панеллерин орнатыў режеси 39,2 процентке орынланып, -7500 киловатлық панельлер, 4,1 мың литрлик қуяш суў ысытқышлары орнатылмаған. Өткерилген мәжилисте бул мәселе айрықша қарап шығылып, белгиленген реже тийкарындағы жумысларды жеделлестириў керек екенлиги атап өтилди. Сондай-ақ, мәжилисте энергия ресурсларынан нәтийжели пайдаланыўды дурыс шөлкемлестириў бойынша да бир қатар әмелге асырылыўы тийис ўазыйпалар сөз етилди. Электр энергиясы ҳәм гәз тәмийнаты бойынша артықша пайдаланылып атырған жағдайлары бойынша энергия ресурсларынан нәтийжели пайдаланыўды дурыс жолға қоймаған айырым басшылар жумыслары сынға алынды.

Айтып өтиў керек, гүз-қыс мәўсиминде биринши нәўбетте халықтың ҳәм социаллық объектлердиң энергия дереклерине болған талабын қанаатландырыў бойынша бир қатар әҳмийетли ўазыйпалар белгилеп алынған. Бул бағдарда теплицалар, қурылыс материалларын ислеп шығарыўшы кәрханарды көмир жанылғысына өткериў белгиленген. Соннан, быйылғы жылда теплица, цемент заводы, гербиш заводы ҳәм ҳәк ислеп шығарыў цехлары сыяқлы бир қатар объектлерди көмирге өткериў белгиленген. Тилекке қарсы, бул ўазыйпалар да талап дәрежесинде орынланбастан қалмақта. Мәжилисте белгилеп берилген ўазыйпалар тийкарында жәми 1555 социаллық объектлердиң ысытыў қазанлары инвентаризациядан өткерилип, олардан 1483 объекттиң ысытыў системасы бойынша тийисли жойбар-смета ҳүжжетлери ислеп шығылғанлығы атап өтилди. Соннан, 620 социаллық тараӯ объектлериниң яғный, 287 мектеп, 269 бақша, 64 денсаӯлықты сақлаӯ объектлериниң ысытыӯ системасын көмир жанылғысына өткериӯ режелестирилмекте. Бул объектлерди мәмлекетлик жеке шерикликке бериӯ бойынша жәми 34 исбилермен анықланып, келисимлер таярланбақта.

Гүз-қыс мәўсиминде энергия жетиспеўшилигиниң алдын алыў, көмир жанылғысына болған талапты толық қанаатландырыў белгилеп берилген еди. Өткерилген мәжилисте бул белгиленген ўазыйпалар бойында еле әмелий жумыслар басланбағанлығы, яғный, көмир қорлары жаратылмағаны айрықша тилге алынды. Мәжилис жуўмағында тийисли тараў басшыларына белгиленген тапсырмаларды орынлаў бойынша тапсырма берилип, алдағы әмелге асырылыўы тийис ўазыйпалар белгилеп алынды.

Қарақалпақстан Республикасы Жоқарғы Кеңесиниң Мәлимлеме хызмети