Бүгин «Барсакелмес» мәмлекетлик буйыртпа қорықханасы аймағында жайласқан «Гүркиреўик» булақ суўы әтирапындағы экосистеманы үйренип шығыў ҳәмде экотуризмди раўажландырыў илажлары ҳаққындағы мәселелерге арналған мәжилис болып өтти

Онда Қарақалпақстан Республикасы Жоқарғы Кеңеси Баслығының орынбасары Р.Сапарбаев Үстирт тегислиги аймағындағы жер асты суўлары резервин терең үйрениў, олардың халық хожалығында ҳәм санаат тараўында пайдаланыў перспективаларын анықлаў кереклигин атап өтти. Айтып өтиў орынлы, Министрлер Кабинетиниң 2022-жыл 31-октябрьдеги 507-санлы арнаўлы қарарына муўапық шөлкемлестирилген «Барсакелмес» мәмлекетлик буйыртпа қорықханасы аймағында жергиликли халық тилинде «Гүркиреўик» деп аталатуғын жер асты булақ суўы дереги жайласқан.

  Анықланған булақ суўының тәбийий жайласыў орны ҳәм қоршаған орталыққа тәсирин анықлаў мақсетинде усы жылдың 24-май күни исши топар тәрепинен дәслепки үйрениў жумыслары алып барылып, аймақта экотуризмди раўажландырыў, өсимликлер ҳәм ҳайўанатлар дүньясын кеңейтиў, оларды сақлап қалыў ҳәм көбейтиў мақсетинде суўдың резерви бойынша кең көлемли гидрогеологиялық изертлеўлер алып барыў кереклиги усыныс етилген. Соңғы жылларда бақланып атырған суў тамтарыслығын инабатқа алып, Үстирт тегислиги аймағындағы жер асты суўлары резервин терең үйрениў, олардың халық хожалығында ҳәм санаат тараўында пайдаланыў перспективаларын анықлаў мақсетке муўапық есапланады. Мәжилисте «Барсакелмес» мамлекетлик буюртпа қорықханасы аймағында «Гүркиреўик» булақ суўы әтирапында экотуристик аймақ шөлкемлестириў ҳәм маршуртлар ислеп шығыў жойбары ҳәм басқа да әҳмийетли мәселелер бойынша сөз етилди.  

Қарақалпақстан Республикасы Жоқарғы Кеңесиниң Мәлимлеме хызмети