Математика пәнинен Муҳаммед ал-Хорезмий атындағы II Халықаралық олимпиадасының сыйлықлаў мәресими болып өтти

Усы жылдың 25-27-октябрь күнлери аралығында пайтахтымыз Нөкис қаласында жоқары оқыў орынлары студентлери арасында математика пәнинен Муҳаммед ал-Хорезмий атындағы II Халықаралық олимпиадасы өткерилди. Бүгин Бердақ атындағы Қарақалпақ мәмлекетлик академиялық музыкалы театрында Мухаммед ал-Хорезмий атындағы халықаралық олимпиадасының сыйлықлаў мәресими болып өтти. Онда дәслеп Қарақалпақстан Республикасы Жоқарғы Кеңесиниң Баслығы Аманбай Орынбаев шығып сөйлеп, барлық қатнасыўшыларды қутлықлады.

Айтып өтиў орынлы, соңғы жыллары ҳүрметли Президентимиз тәрепинен билимлендириўге, илим-пәнди раўажландырыўға ҳәм жаслардың тәрбиясына айрықша итибар қаратылып атыр. Жасларымыздың озық ойлы, жоқары билимге ийе ҳәр тәреплеме жетик инсан болып камалға келиўинде барлық мүмкиншиликлер жаратып берилмекте. Бул бағдарда математика пәнин раўажландырыў, усы арқалы заманагөй тараўлар есапланған робототехника, IT, экономика ҳәм басқа да жөнелислердиң кеңнен ен жайыўына мүмкиншилик жаратылып атырғанлығын айрықша атап өтсек болады.

  2 күн даўамында өткерилген халықаралық олимпиадада улыўма 40 тан аслам жоқары оқыў орынларынан 200 ден зыят студент-жаслар белсене қатнасты. Өткерилген сыйлықлаў мәресиминде халықаралық олимпиада жеңимпазларына диплом, медаль ҳәм баҳалы саўғалар тапсырылды. Пән олимпиадасында командалық есапта I орынды Бердақ атындағы Қарақалпақ мәмлекетлик университети ҳәм Шароф Рашидов атындағы Самарқанд мәмлекетлик университети, II орынды Түркменстан Республикасының Халықаралық гуманитар пәнлер ҳәм раўажланыў университети, III орынды Мырза Улуғбек атындағы Өзбекстан миллий университети жеңип алды. Илаж көркем өнер ҳәм мәденият хызметкерлери атқарыўындағы концерт бағдарламасы менен даўам етти.  

Қарақалпақстан Республикасы Жоқарғы Кеңесиниң Мәлимлеме хызмети