Елимизге келген ҳәр қандай мийман И.В.Савицкий атындағы қарақалпақ мәмлекетлик көркем өнер музейин көрместен кетпейди. Татарстан Республикасы басшысы Рустам Миннихановта бул әдетти шетлеп өтпеди. Делегацияның гезектеги мәнзили И.В.Савицкий атындағы қарақалпақ мәмлекетлик көркем өнер музейине саяхат етиў болды. Бул музей 1966-жылда шөлкемлестирилген болып, оған И.В.Савицкийдиң мийнетлери ҳәм ол топлаған қарақалпақ халық әмелий көркем өнер шығармалары негизинде тийкар салынған. Ондағы дүрдана шығармалар пүткил дүнья итибарын тартып, Музейдиң «Сахрадағы лувр», «Шығыс гәўхары» деп аталғаны менен әҳмийетли. Татарстан Республикасы басшысы музейде сақланып атырған бийбаха экспонатлар менен танысар екен, бул музейге туристлер ағымын еледе күшейтиў бойынша бирге ислесиўге таяр екенлигин билдирди.