Қарақалпақстан Республикасы мәҳәллени қоллап-қуўатлаў Кеңесиниң шөлкемлестириў мәжилиси болып өтти

Мәжилисти Қарақалпақстан Республикасы Жоқарғы Кеңесиниң Баслығы Аманбай Орынбаев ашты ҳәм алып барды. Өткерилген мәжилисте ҳүрметли Президентимиздың 2023-жыл 21-декабрь күнги «Мәҳәлле институтының жәмийеттеги орнын түпкиликли жақсылаў ҳәм оның халықтың машқалаларын шешиўде биринши буўын сыпатында ислеўин тәмийинлеўге қаратылған илажлар ҳаққында»ғы 209-санлы пәрманы ҳәм де «Өзбекстан мәҳәллелери аўқамы жумысын жолға қойыў ҳәм мәҳәллелерде басқарыў системасын жетилистириўге қаратылған қосымша илажлар ҳаққында»ғы 402-санлы қарары менен мәмлекетимизде мәҳәлле институты абыройының және де артыўына итибар күшейгенлиги атап өтилди. Айтып өтиў орынлы, усы пәрман ҳәм қарар менен мәҳәллелерди қоллап-қуўатлаўды және де жеделлестириў, мәҳәлле кесиминде ислесиўге жуўапкер болған шахслардыӊ жумысын нәтийжели шөлкемлестириў ҳәм олардың бирге ислесиўин тәмийинлеў және мәҳәллелердиӊ өз жумысын әмелге асырыўы ушын зәрүрли шараятлар жаратыў, оларға нызамда белгиленген ўәкилликлерин әмелге асырыўына көмеклесиўге қаратылған ис-илажлары белгилеп берилди. Усы тийкарда Қарақалпақстан Республикасы, ўәлаятлар ҳәм Ташкент қаласы, сондай-ақ район ҳәм қалаларда Мәҳәллени қоллап-қуўатлаў кеңеслерин шөлкемлестириў ҳәм Өзбекстан Республикасы Бас министри, Қарақалпақстан Республикасы Жоқарғы Кеңесиниң Баслығы, ўәлаятлар ҳәм Ташкент қаласы, район ҳәм қала ҳәкимлерине тийисли тәртипте республика кеңеси, аймақлық кеңеслерге жәмийетшилик тийкарында басшылық етиў белгиленди. Өткерилген шөлкемлестириў мәжилисинде район (қала)лардан делегат сыпатында сайланып келген 68 мәҳәлле пуқаралар жыйынларының баслықлары, сондай-ақ, бирге ислесиўши шөлкемлерден ўәкиллер ҳәмде ғалаба хабар қураллары ўәкиллери қатнасты.

Қарақалпақстан Республикасы Жоқарғы Кеңесиниң Мәлимлеме хызмети