Усы жылдың 10-январь күни ҳүрметли Президентимиз Шавкат Мирзиёев басшылығында 2024-жылда Қарақалпақстан Республикасын социаллық-экономикалық раўажландырыў бағдарындағы жумыслардың анализи ҳәм келеси ўазыйпалардың додаланыўы бойынша мәжилис болып өтти

Онда Жоқарғы Кеңес Баслығы 2024-жылда Қарақалпақстанда әмелге асырылыўы режелестирилген жойбарлар презентациясы менен таныстырды. Атап өтиў керек, республикамызда 120 мың жаңа жумыс орнын жаратыў белгиленген болса, соннан, 65 мың жумыс орнын аўыл хожалығы тараўында жаратыў режелестирилмекте. Айрықша тилге алыў орынлы, ҳүрметли Президентимиз тәрепинен исбилерменликти раўажландырыў ҳәм Қарақалпақстанда инвестициялық тартымлылықты арттырыў, усы тийкарда жаңа жумыс орынларын жаратыў бағдарында тарийхый пәрманлар қабыл етилген еди. 2024-жылда Президентимиз тапсырмасы менен аўыл хожалығы тараўы бойынша да Қарақалпақстанға айрықша жеңиллик бериў мәселесинде және бир әҳмийетли қарар жойбарын ислеп шығыў тапсырмасы берилди ҳәм бурын болмаған жеңилликлер жаратылыўы күтилмекте. Буннан тысқары, IT тараўы, туризм тараўы бойынша да жаңа қарар жойбарлары ислеп шығылыўы ҳәм бир қатар жеңилликлер берилиўи күтилип атыр.

Қарақалпақстан Республикасы Жоқарғы Кеңесиниң Мәлимлеме хызмети