Аўыл хожалығы тараўы ушын берилген жеңиллик тийкарында қысқа ўақыт ишинде республикамызға жаңадан 377 техника ҳәм агрегатлар алып келинди
1392
Ҳүрметли Президентимиздиң арнаўлы қарары тийкарында аўыл хожалығы тараўын ҳәр тәреплеме раўажландырыў ҳәм механизацияластырыў бойынша бир қатар имканиятлар жаратып берилген еди. Қарар шеңберинде Қарақалпақстанға улыўма 67 млрд. 873 млн. сум қаржы тийкарында жәми 783 техника алып келиниўи белгиленген болып, реже бойынша артығы менен 962 техника ушын шәртнамалар дүзилди. Соннан, жәми 377 техника ушын аванс төлемлери төлеп берилди. Нәтийжеде бул техникалардан 272 данасы лизинг тийкарында республикамызға кирип келиўи тәмийинленди. Буннан тысқары, хожалықлардың өз қаржылары ҳәм банк кредитлери есабынан 105 техника алып келиниўине ерисилди ҳәм бүгинги күнде атыз майданларында хызмет етпекте. Жәми алып келинген 377 техникадан 102 си жоқары өнимли тракторлар болса, қалған бөлеги басқа түрдеги техникалар (комбайн, пахта машинасы, мото техникалар ҳәм басқалар) ҳәм ҳәр қыйлы агрегатлар есапланады. Айтып өтиў орынлы, жаңа техникалардың алып келиниўи менен аўыл хожалығы тараўында өнимдарлық арттырылып, егистен баслап дақылды жыйнап алғанға шекемги процеслер жеделлеседи. Әлбетте, ҳүрметли Президентимиз тәрепинен жаратып берилген имканиятлар натийжесинде аўыл хожалығы тараўындағы машқалалар жеңиллесип, жоқары өнимдарлыққа беккем тийкар жаратылады.