Жоқарғы Кеңес депутатлары ҳәм коррупцияға қарсы гүресиў аймақлық кеңесиниң ўәкиллери кәсиплик (дөретиўшилик) имтиханлар барысы менен танысты
1396
Әжинияз атындағы Нөкис мәмлекетлик педагогикалық институтында 2022-2023-оқыў жылы ушын бакалавриаттың айрықша қәбилет талап етилетуғын тәлим бағдарларына кәсиплик (дөретиўшилик) имтиханлар өткерилмекте.
Бүгин, 3-август күни Қарақалпақстан Республикасы Жоқарғы Кеңесиниң депутатлары, тийисли комитет баслықлары, соның менен бирге, Қарақалпақстан Республикасы Коррупцияға қарсы гүресиў аймақлық кеңесиниң ўәкиллери институтта даўам етип атырған имтиханлардың барысы менен танысты.
Институтта 1-августтан музыкалық тәлим, 2-августтан дене мәденияты ҳәм 3-августтан баслап сүўретлеў өнери ҳәм инженерлик графикасы тәлим бағдарларына имтиханлар өткерилип атырған болып, имтиханлардың белгиленген талаплар тийкарында әдил ҳәм ашық-айдын өтиўи жәмийетлик шөлкемлер, сиясий партиялар, ғалаба хабар қураллары, соның менен бирге, Жоқары ҳәм орта арнаўлы билимлендириў министрлигинен бириктирилген ўәкиллер тәрепинен қадағаланбақта.
Имтиханлар Интернет тармағы арқалы ата-аналар ҳәм кең жәмийетшилик ўәкиллерине тиккелей алып көрсетилмекте.
Ата-аналар ушын саялы, салқын жерлерде күтиў орынлары, абитуриентлер ушын мәсләҳәт орайы ҳәм медициналық жәрдем көрсетиў пунктлери, сондай-ақ, басқа да шараятлар жаратылған.
Абитуриентлердиң билим ҳәм көнликпелерин баҳалаў ушын θзбекстанның түрли орынларынан тәжирийбели профессорлар ҳәм қәнигелер бириктирилген.
θткерилген кәсиплик (дөретиўшилик) имтиханлары толығы менен видеожазыўларға алынып, абитуриентлердиң имтиханларда топлаған нәтийжелери сол күнниң өзинде институттың рәсмий веб-сайты ҳәм социаллық тармақлардағы каналлары арқалы жәрияланбақта.
Бақлаўшылар сүўретлеў өнери ҳәм инженерлик графикасы, сондай-ақ, музыкалық тәлим бағдарына өткерилип атырған имтихан процесслерине қатнасып, имтихан барысын көзден өткерди.
