ҚМУда Экосистемалар ҳәм биокөптүрлиликти қорғаў бойынша Өзбекстан-Германия орайы - УзГЕБның салтанатлы ашылыў мәресими болып өтти

Бердақ атындағы Қарақалпақ мәмлекетлик университетинде «Биокөптүрлиликти қорғаў ҳәм Өзбекстан Республикасындағы экосистемалар -  Өзбекстан Республикасы ҳәм Германия федератив Республикасы арасындағы бирге ислесиў потенциалы» атамасында халықаралық илимий-әмелий конференция өткерилди. 

Конференция шеңберинде Бердақ атындағы Қарақалпақ мәмлекетлик университетинде Экосистемалар ҳәм биокөптүрлиликти қорғаў бойынша Өзбекстан-Германия орайы - УзГЕБның салтанатлы ашылыў мәресими болып өтти. 

Онда Қарақалпақстан Республикасы Жоқарғы Кеңеси Баслығының орынбасары Р.Сапарбаев, Өзбекстан ҳәм Германияның илимий, билимлендириў ҳәм инновациялық тараўдағы жетекши мәкемелериниң ўәкиллери қатнасты. 

Илажда Орайдың ашылыўы тек ғана илим емес, ал, экологиялық қәўипсизлик, турақлы раўажланыў ҳәм халықаралық илимий бирге ислесиў ушын әҳмийетли ўақыя екени атап өтилди.

Бул Орай регионаллық ҳәм халықаралық көлемде экологиялық турақлылықты тәмийинлеўге қаратылған әҳмийетли баслама болып, ол Өзбекстанның турақлы раўажланыў стратегиясына үнлес тәризде жумыс алып барады.