Жоқарғы Кеңес Баслығы Тахтакөпир районындағы жаңа жойбарлар ҳәм пуқаралардың қосымша дәрамат алыўына көмеклесиў жумысларын барып көрди
Дәслеп, Жоқарғы Кеңес Баслығы «Қараой» АПЖ аймағында жайласқан «KAUSAR TEGIRMON» ЖШЖ кǝрханасының Шарўашылық жойбары бойынша әмелге асырған жумысы менен танысты. Атап өтиў орынлы, 2025-жыл даўамында кǝрхана тǝрепинен улыўма баҳасы 32,0 млрд.сумлық шарўашылықты раўажландырыў ҳǝм сүтти қайта ислеў жойбарларын ǝмелге асырыў белгиленген. Бүгинги күнде шарўашылық комплексине 120 бас нǝсилли қарамаллар алып келинип күтимли бағылмақта.
Буннан кейин «KAUSAR TEGIRMON» ЖШЖниң баҳасы 878,0 мың долларлық «Жүнди қайта ислеў» жойбары шеңберинде жолға қойылған өндирис процесслери, технологиялық үскенелер ҳәм өним таярлаў басқышлары көзден өткерилди.
Буннан соң, Жоқарғы Кеңес Баслығы усы аймақта жайласқан, Германияға экспортын әмелге асырып атырған «Good Salt production» ЖШЖ тәрепинен шөлкемлестирилген «Ас дузын ислеп шығарыў» кәрханасында болып, усы жойбардың әмелге асырылыўы, өндирис қуўатлықлары ҳәм жаратылған жумыс орынлары менен жақыннан танысты.
Жоқарғы Кеңес Баслығы «Тахтакөпир» ППЖ аймағында шөлкемлестирилген киши санаат зонасында болып, усы аймақта жумыс алып барып атырған «Фром Мебел» жеке меншик кәрханасы тәрепинен шөлкемлестирилген «Мебел ислеп шығарыў» цехының жумысы менен жақыннан танысты.
Буннан соң, Жоқарғы Кеңес Баслығы райондағы “Дәўқара” АПЖ аймағында «Taxtakopir Gold Tekstil Mahsulotlari» ЖШЖ тәрепинен шөлкемлестирилип атырған тоқымашылық жойбары менен жақыннан танысты.
Президентимиздиң 129-санлы пәрманына тийкар бул инвестициялық жойбар ушын 4,5 гектар жер майданы ажыратылды. Улыўма баҳасы 25,4 млн АҚШ доллары болған жойбарға муўапық жылына 5 мың тонна жип ийирип шығарылып, жылына 11,1 млрд. сум муғдарында таяр өним ислеп шығарыў режелестирилген. Толық иске түсиўи нәтийжесинде 257 жаңа жумыс орынлары жаратылады.
Районға сапар даўамында Жоқарғы Кеңес Баслығы райондағы «Өзбекстан» МПЖ аймағында жасаўшы Н.Файзуллаев, Н.Аметов, Ө.Темирбеков ҳәм «Айдын жол» МПЖ да жасаўшы М.Даўлетяровлардың шаңарағында болып, қыйтақ жер ийелери менен жақыннан сәўбетте болды. Олардың азғана жерден мол дәрамат алып атырғаны жоқары баҳаланды.
Тоғай хожалығы жер майданлары да көзден өткерилди. Гүзги терек егиўге жерлерди ҳәм нәллерди таярлаў, жумысларды шөлкемлескенлик пенен алып барыў бойынша жуўапкерлерге тапсырмалар берилди.
Райондағы «А.Адилов» АПЖ аймағындағы «Торанғыл-сай» ҳәм «Атакөл» АПЖ аймағында жасласқан «Тайымбет» фермер хожалықларындағы жумыслар да көзден өткерилди. Аўыл хожалығы тараўында суўдың артықша жумсалыўының алдын алыў, зүрәәтлиликти арттырыў ҳәм заманагөй технологияларды кеңнен енгизиў бойынша бул жумыслар системалы түрде даўам еттирилиўи керек екенлиги атап өтилди.
