Қанлыкөл районында көше бийлери менен пикирлесилип, халықтың турмыс шараятын жақсылаў бойынша жумыслар көзден өткерилди
Қарақалпақстан Республикасы Жоқарғы Кеңесиниң Баслығы Аманбай Орынбаев Қанлыкөл районында халықтың абадан турмысын тәмийинлеў, жаңа жумыс орынларын жаратыў, қосымша дәрамат алыўына көмеклесиў бағдарында әмелге асырылып атырған жумыслар менен танысты.
Дәслеп, Тоғай хожалығы питомнигинде әмелге асырылып атырған жумыслар көзден өткерилди. Буннан соң «Бескөпир» АПЖ аймағында жасларға ажыратылған жер майданлары сондай-ақ, Агробанк АЖ тәрепинен шөлкемлестирилген «Бир контур – бир өним» өлшеми тийкарында шөлкемлестирилген жумыслар барып көрилди.
Жоқарғы Кеңес Баслығы «Арзымбетқум» АПЖдағы қыйтақ жеринен нәтийжели пайдаланып атырған Өтепбергенов Сәрсенбайдың ҳәм үй шараятында хызмет көрсетиўди жолға қойған Сарсенбаева Махираның шаңарағында болып, азғана жерди мол дәрамат дерегине айландырыў бойынша шөлкемлестирилген жумыслар менен танысты. Бундай жумысларды аўыл халқы арасында еле де кеңнен ен жайдырыў керек екенлиги атап өтилди.
Буннан соң Жоқарғы Кеңес Баслығы «Мәденият» МПЖдағы көше бийлери менен ушырасты. Олардың тилек-өтинишлерин тыңлады. Машқалаларды белгилеп алып, тез арада шешимин табыў бойынша жуўапкерлерге анық тапсырмаларды берди.
Район аймағындағы «Мебель Голд Жасмина» ЖШЖ тәрепинен мебель ислеп шығарыў жойбары ҳәм «АБДИМУРАТОВ ТАЗАБАЙ» ЖШЖниң кондитер өнимлерин ислеп шығарыў жойбарлары көзден өткерилди. Буннан тысқары, «ЛАН-С» кәрханасы жумыслары да үйренилди. Исбилерменлерди барқулла қоллап-қуўатлаў, олардың өз жумысын еле де раўажландырыўы ушын барлық жәрдемлерди көрсетиў бойынша жуўапкерлерге тапсырмалар берилди.
Жоқарғы Кеңес Баслығы район орайындағы аралықтан хызмет көрсетиўши BPO орайы менен де жақыннан танысып, санластырыў ҳәм информация технологияларының турмысымызда әҳмийети артып баратырғанлығы айрықша тилге алынды.
