Бозатаў районында халықтың машқалаларына шешим табыў ҳәм қосымша дәрамат алыўына көмеклесиў бойынша жумыслар көзден өткерилди
Қарақалпақстан Республикасы Жоқарғы Кеңесиниң Баслығы Аманбай Орынбаев Бозатаў районында халыктың бәнтлигин тәмийинлеў, жаңа жумыс орынларын жаратыў ҳәм машқалаларға шешим табыў бағдарында әмелге асырылып атырған жумыслар менен танысты.
Дәслеп, Жоқарғы Кеңес Баслығы «Еркиндәрья» АПЖдағы коллектор бойында шөлкемлестирилген үйрек бағыў жойбарын көзден өткерди. Сондай-ақ, «Еркиндәрья» АПЖдағы Өтениязов Ахметтиң пал ҳәррешиликти раўажландырыў жойбары, «Қусханатаў» АПЖдағы Әлжанов Ғайбулла ҳәм Төремуратов Жамаладдинниң қыйтақ жерлеринде шөлкемлестирилген жумыслар барып көрилди. Қыйтақ жер дәрамат дереги ал, бундай жумыслар ҳәр бир үйде шөлкемлестирилиўи, соның менен бир қатарда пуқаралардың бәнтлигин тәмийинлеў, қосымша дәрамат алыўына көмеклесиў бағдарында жаңа жойбарларды көбейтиў керек екенлиги атап өтилди. 
Буннан соң, «Еркиндәрья» АПЖдағы газ тармағы линиясының 2 км бөлегинде Бозатаў тәжирийбеси тийкарында әмелге асырылып атырған жумыслар барып көрилди. Онда артықша газ жумсалыўының алдын алыў ҳәм үнемли пайдаланыў бойынша жумыслар көрип шығылды. 
Жоқарғы Кеңес Баслығы Өзбекстан кәсиплик аўқамлары Федерациясы тәрепинен 123 млрд. сум муғдарында қаржыландырылып, қурылыс жумыслары алып барылып атырған санатория менен де жақыннан танысты. Улыўма 200 адамға мөлшерленген бул орын, халқымыздың денсаўлығын тиклеўине барлық мүмкиншиликлер жаратылатуғын айрықша мәсканлардың бирине айланатуғынлығы атап өтилди. 
«Зарбдор» тәжирийбеси тийкарында шөлкемлестирилген өнерментлер аллеясы, Жаслар орайында шөлкемлестирилген тил үйрениў курслары жумыслары да барып көрилди. Халқымыз ийгилиги жолында хызмет ететуғын ҳәр қандай баслама қоллап-қуўатланатуғынлығы атап өтилди. 
Буннан соң, ҳүрметли Президентимиздиң тапсырмасы менен жақында орнатылып, пайдаланыўға тапсырылған Бозатаў районын ҳәм арқа районларды тиккелей Қоңырат районы менен байланыстырыўшы понтон көпир де барып көрилди. Халқымыздың кеўил-кейпиятына тәсир ететуғын ҳәр қандай машқаланың шешимин табыўда Президентимиздиң әдил сиясаты турғаны, буннан пуқаралардың да шексиз миннетдар екенлиги айрықша қанаатланыўшылық пенен тилге алынды.