Игор Витальевич Савицкийдиң туўылғанының 110 жыллығы кең түрде белгиленди

Жақында белгили художник, мәденият ғайраткери ҳәм «Саҳрадағы Лувр» атағын алған музей тийкарын салыўшы Игор Витальевич Савицкийдиң туўылғанының 110 жыллығына арналған илаж өткерилди.  

Дәслеп, Қарақалпақстан мәдениятын ҳәм көркем өнерин дүньяға танытыўда салмақлы үлес қосқан пидайы инсан, атақлы коллекционер – Игор Савицкийдиң қәбирине зыярат етилип, гүлшеңберлер қойылды. 

Буннан соң  И.В.Савицкий атындағы Қарақалпақстан мəмлекетлик көркем өнер музейи кинозалында еслеў ушырасыўы болып өтти. 

Онда Қарақалпақстан Республикасы Жоқарғы Кеңесиниң комитет баслығы М.Атамуратов шығып сөйлеп, Савицкийдиң мийнетлери ҳәм Қарақалпақстан  көркем өнери ҳәм мәдениятын дүньяға танытыўдай машақатлы, соның менен бирге мақтанышлы мийнетлери ҳаққында кең түрде атап өтти. 

 Буннан соң тараў хызметкерлери Игор Витальевич Савицкийдиң өмири ҳәм мийнет жолы, оның пидәкерли жумыслары ҳаққында баянат жасады.  

Илаж даўамында, «Игор Савицкий дүньясы» көргизбеси бойлап экскурсия шөлкемлестирилди. Экскурция даўамында мийманлар оның коллекционерлик жолы, дөретиўшилиги ҳәм көркем өнерге болған айрықша меҳирине және бир мәрте гүўа болды.