Жоқарғы Кеңес Баслығы Тахтакөпир районында халықтың турмыс шараятын жақсылаў бағдарында әмелге асырылып атырған жумыслар менен танысты
Қарақалпақстан Республикасы Жоқарғы Кеңесиниң Баслығы Аманбай Орынбаев Тахтакөпир районында халықтың бәнтлигин тәмийинлеў, пуқаралардың турмыс абаданлығын арттырыў, исбилерменликти қоллап-қуўатлаў бағдарында әмелге асырылып атырған жумысларды үйренди.
Дәслеп, “Қараой” мәҳәллесинде жумыссыз жасларға ажыратылған жер майданларында шɵлкемлестирилген “бир контур бир ɵним” жойбары сондай-ақ, усы мәҳәлле аймағында 10 жастың бәнтлиги тәмийинленген ыссыхана жумысы барып көрилди. Сондай-ақ, «Өзбекстан» мәҳәллеси аймағындағы Жаббарбергенов Есемураттың қыйтақ жеринде шөлкемлестирилген жумыслар көзден өткерилди. Егислик майданларынан нәтийжели пайдаланыўды шөлкемлестириў арқалы жоқары дәрамат алыўды жолға қойыў әҳмийетли екенлиги атап өтилди. 
Буннан соң Жоқарғы Кеңес Баслығы «А.Адилов» АПЖ аймағында «KAUSAR TEGIRMON» ЖШЖ тәрепинен 878,0 мың АҚШ доллары муғдарында қаржылар тийкарында иске түсирилген «Жүнди қайта ислеў» жойбары, «Тахтакопир» мәҳәллесиндеги киши санаат зонасында әмелге асырылып атырған жумыслар, «Taxtakopir Nan O’nimleri» ЖШЖ тарепинен дǝн ɵнимлерин сортлаў (колибировка) жойбары менен жақыннан танысты. Исбилерменликти раўажландырыў бағдарында олар ушын барлық қолайлы шараятларды жаратыў, жақыннан жәрдем бериў бойынша жуўапкерлерге анық тапсырмалар берилди.
Ҳаял-қызлардың бәнтлигин тәмийинлеў бағдарында “Тахтакөпир шебер қоллар” тигиўшилик кәрханасында шөлкемлестирилген жумыслар барып көрилип, исбилерменниң өз жумысын кеңейтиўинде ушырасып атырған машқалалары тыңланды.
Район орайында жаңадан қурылып атырған көп қабатлы турақ жайдың қурылысы барысы да үйренилди. Қурылыс жумысларын өз ўақтында ҳәм сапалы етип питкериў бойынша тапсырмалар берилди.
Аралықтан хызмет көрсетиўши BPO орайы ҳәм районлық медицина бирлеспесиндеги санластырыў жумыслары көзден өткерилди.
Жоқарғы Кеңес Баслығы буннан соң алдағы әмелге асырылыўы тийис жумыслар ҳәм шешимин күтип турған мәселелерди белгилеп алыў бойынша көше бийлери ҳәм нураныйлар менен ушырасты.
