Нөкис қаласында Қол урысының R1 жѳнелиси бойынша Профессионал спортшылар арасында «Аралбойы кубогы» халықаралық турнири өткерилди

Бүгин Нөкис қаласындағы орайлық амфитеатрда Қол урысының R1 жѳнелиси бойынша Профессионал спортшылар арасында «Аралбойы кубогы» халықаралық турнири жарыслары болып өтти.

Онда Қарақалпақстан Республикасы Жоқарғы Кеңесиниң Баслығы Аманбай Орынбаев шығып сөйлеп, барлық қатнасыўшыларға әўмет тиледи. 

Буннан соң турнир беллесиўлерине старт берилди. Онда Әзербайжан, Беларус, Қырғызстан, Россия, Түркия ҳәм Италия мәмлекетлеринен професионал спортшылар қатнасты. 

62 кг жеңил салмақта Тоссо Пьетро (Италия) ҳәм Абдумажид Қосимов (Өзбекстан) беллесиўинде Абдумажид Қосимов жеңимпаз болды. 70 кг орта салмақта Медведева Аселия (Белорус) ҳәм  Нилуфар Палвонова (Өзбекстан) беллесиўинде Нилуфар Палвонова жеңимпаз болды. 73 кг  орта салмақта  Аброр Хакимов (Қырғызстан) ҳәм Азизхон Абдуллаев (Өзбекстан) беллесиўинде Азизхон Абдуллаев қарсыласынан үстем болды. 80 кг орта салмақта Набиев Гундуз (Азербайжан) ҳәм Айбек Махсетов (Өзбекстан) арасындағы беллесиўде Набиев Гундуз жеңип шықты. 

97 кг салмақ категориясы бойынша Шахзаде Махсун (Туркия) ҳәм Бегзодбек Махаматов  (Өзбекстан) арасындағы беллесиўде Бегзодбек Махаматов жеңип шықты. 

Күнниң орайлық беллесиўи 97 кг аўыр салмақ категориясында Болотских Евгений (Россия) ҳәм Оғабек Жуманиязов (Өзбекстан) беллесиўинде Оғабек Жуманиязов қарсыласына имканият калдырмады.

Кескин беллесиўлер, аяўсыз соққылар астында өткен ушырасыўлар жыйналғанларда үлкен тәсир қалдырды. Жеңимпазлар қутлықланып, оларға пул сыйлықлары менен естелик саўғалары тапсырылды.