«Орайлық Азия педагоглары - бир регион, бир даўыс, бир күш!» шеңбериндеги илажлар Қаратерең бойында даўам етти

Республикамызда өткерилип атырған «Орайлық Азия педагоглары - бир регион, бир даўыс, бир күш!» халықаралық форумы қатнасыўшылары Тахтакөпир районына барды. 

Дәслеп, форум қатнасыўшылары «Бөршитаў» таўының төбесинде шөлкемлестирилген «Этно аўылы»на барып, бул жерде әййемги халқымыздың бай мәдений турмыс тәризи ҳәм миллий архитектуралық усылда жаратылған шаңарақлар, миллий кийимлери ҳәм олар пайдаланған үй әнжамлары менен жақыннан танысты.

Буннан соң, форум қатнасыўшылары «Қаратерең» экотуризм орайында жаратылған шараятлар - миллий дәстүрлер тийкарында қурылған қара үйлер, ҳақыйқый шөл орталығы ҳәм тәбийғый көринислери менен танысты. 

Сондай-ақ, қарақалпақ халқының бай мәденияты ҳәм дәстүрий көркем өнери сәўлеленген көргизбелер, этнографиялық көркем шығыўлар мийманларда үлкен тәсир қалдырды. Шөлкемлестирилген сахналық көринислер арқалы мийманлар көп миллетли халқымыздың мәденияты ҳәм қәдириятларын жақыннан сезиў имканиятына ийе болды.

Форумның екинши бөлиминде педагоглар ушын әмелий оқыў-семинар илажлары шөлкемлестирилип, онда билимлендириўде инновациялық көзқараслар, санлы технологиялардан пайдаланыў ҳәм халықаралық бирге ислесиўди раўажландырыўға байланыслы мәселелер додаланады.