Nókis rayonında ámelge asırılıp atırǵan jumıslar úyrenildi
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis rayonına bardı.
Dáslep, Joqarǵı Keńes Baslıǵı rayon orayındaǵı «Aqmanǵıt» posyolka puqaralar jıyını aymaǵınan ótiwshi «Aqmanǵıt» kanalı átirapında xalıq ushın qolaylı sharayat jaratıw maqsetinde 6,6 milliard sum qarjı tiykarında 24 saatlıq (24/7) rejimde jumıs alıp baratuǵın arnawlı xızmet kórsetiw ornı hám «Xalıq seyili» sawda-kewilashar orayınıń qurılısı menen jaqınnan tanıstı.
«Samanbay» awıl puqaralar jıyını aymaǵında jaslardıń bántligin támiyinlew maqsetinde jańadan shólkemlestilirip atırǵan úyrek baǵıw orınları kózden ótkerildi. Bul jerde ulıwma 40 jumıs ornı jaratılıwı rejelestirilgen bolıp, úyreklerdi kóbeytiw, máyek hám gósh ónimlerin jetistiriw belgilengen.
Bunnan soń puqaralardıń turmıs sharayatın jaqsılaw baǵdarında ele de sheshimin kútip turǵan máselelerdi anıqlaw hám mashqalalarǵa sheshim tabıw boyınsha rayondaǵı kóshe biyleri, nuranıy-aqsaqallar menen ushırasıw ótkerilip, aldaǵı wazıypalar belgilep alındı.
Úyreniwler dawamında Nókis rayonında xalıqtıń turmıs jaǵdayın jaqsılaw, rayondı sociallıq-ekonomikalıq jaqtan rawajlandırıw, mámleketlik baǵdarlamalar, ámelge asırılıwı tiyis jumıslar sheńberinde belgilengen wazıypalardıń orınlanıwı boyın májilis ótkerilip, kún tártibindegi máseleler sın kóz-qarasta talqılandı.
