Хожели районында халықтың турмыс жағдайын жақсылаў бағдарында әмелге асырылып атырған жумыслар үйренилди

Қарақалпақстан Республикасы Жоқарғы Кеңесиниң Баслығы Аманбай Орынбаев Хожели районында халықтың турмыс шараятын жақсылаў бағдарында әмелге асырылып атырған жумыслар менен танысты.

Дәслеп, Жоқарғы Кеңес Баслығы «Сарышүнгил» аўыл пуқаралар жыйыны аймағындағы Таўша аймағына барды. Атап өтиў керек, бул жерде алдын 149 үйде пуқаралар термиттен зыян көрип, жасап атырған еди. Бул машқаланың шешими таўылып, дерлик барлық хожалықлардың қәўипсиз орынға көширилиўи тәмийинленди.

Буннан соң, «Бағман» МПЖ аймағындағы «Балық ЮК» ЖШЖ тәрепинен жолға қойылған балық жетистириў жойбары сондай-ақ, «Қумбыз» МПЖдағы «Қырық қыз» ЖШЖ тәрепинен жолға қойылған тигиўшилик кәрханасы жумыслары көзден өткерилди. Исбилерменлердиң өз жумысын кеңейтиўи ушын барлық әмелий жәрдемлерди көрсетиў, оларды қоллап-қуўатлаў бойынша жуўапкерлерге тапсырмалар берилди.

«Пәрўаз» МПЖ аймағында жолға қойылған «Кингсман» жеке меншик мектеби жумыслары да үйренилди. Улыўма билим бериў мәкемелери менен бирге мәмлекетлик емес мектеплердиң жумысы жолға қойылыўы билимлендириў сапасын еле де арттырыўға хызмет етиўи ҳәм бундай мектеплерди еле де көбейтиў керек екенлиги атап өтилди.

Жоқарғы Кеңес Баслығы «Фаррухбек Хожели» фермер хожалығы тәрепинен жолға қойылған шарўашылық жойбары менен де жақыннан танысты. Жаңа жумыс орынларын жаратыўға қаратылған бундай жойбарлар басламашылары барқулла қоллап-қуўатланыўы керек екенлиги айрықша тилге алынды.

Пуқаралардың турмыс шараятын жақсылаў бағдарында еле де шешимин күтип турған мәселелерди анықлаў ҳәм машқалаларға шешим табыў бойынша райондағы көше бийлери, нураныйлар менен ушырасыў өткерилип, әмелге асырыўы тийис ўазыйпалар белгилеп алынды.

Буннан соң, район белсендилери қатнасыўында мәжилис өткерилип, районды социаллық-кономикалық жақтан раўажландырыў мәселелери талқыланды.