Жоқарғы Кеңес Баслығының орынбасары Р.Нуразизов Беруний районында түрли тараўларда жумыс алып барып атырған ҳәм билим алып атырған жаслар менен ушырасып, олардың мүрәжатларын орнында тыңлады

Дәслеп “Хорезм” мәҳәллеси аймағында жайласқан цехта жасларға аргон кепсерлеўдиң сырларын үйретип киятырған Ислам Худайбергеновтың жумысы көзден өткерилди.

Бул оқыў цехында оқыў курсларын тамамлаған жаслар сырт мәмлекетлерге нызамлы түрде мийнет миграциясына "профессионал уста" есабында жол алмақта.

Автомобиллерге заманагөй детайлинг хызметин көрсетиў тараўында 100 млн. сум жеңиллетилген кредит есабынан жумысын баслаған 24 жасар исбилермен Акмал Эргашев 3 жасты жумыс пенен тәмийинлеген. Ол бүгинги күнде жумысын кеңейтиўди режелестирген.

Буннан кейин, "Эризон саўда комплекси"н шөлкемлестириў жумыслары үйренилди. Бул саўда полигонында кеўилашар балалар ойын майданы, сондай-ақ, улыўма аўқатланыў орынлары, қурылыс товарлары дүканлары орын алған. Улыўма баҳасы 1 миллион АҚШ доллары болған заманагөй саўда имаратында 100 ден аслам жаслар турақлы жумыс пенен тәмийинленеди. Үйрениўлер даўамында жуўапкерлерге жаслардың исбилерменлигин қоллап-қуўатлаў бойынша анық тапсырмалар берилди.

Жаслар менен ушырасыўдың кейинги мәнзили райондағы 6-санлы балалар музыка ҳәм көркем өнер мектеби болды. Жоқарғы Кеңес Баслығының орынбасары дөгереклердиң жумысы менен танысты ҳәм жаслардың усынысларын тыңлады.

Спорт мектебинде "Президент олимпиадасы шыңлары" спорт жарысына таярлық көрип атырған волейбол сайланды командасының ойынлары ҳәм оларға жаратылған шараятлар көзден өткерилди. “Зиёкор” мәҳәллесинде үй шараятында билим алып атырған 65-санлы улыўма орта билим бериў мектеби оқыўшысы Сурайё Султонназароваға ноутбук саўға етилди.

Әлбетте, жаслардың машқалаларын үйрениў, оларға ҳәр тәреплеме жәрдем бериў бүгинги күнниң тийкарғы принциплеринен бирине айланған ҳәм бундай ийгиликли жумыслар системалы түрде даўам еттириледи.