Қоңырат районында исбилерменликти раўажландырыў арқалы халықтың абаданлығын арттырыў бағдарындағы жумыслар үйренилди

Қарақалпақстан Республикасы Жоқарғы Кеңесиниң Баслығы Аманбай Орынбаев исбилерменликти раўажландырыў, жаңа жумыс орынларын жаратыў арқалы халықтың абадан турмысын тәмийинлеў бағдарында әмелге асырылып атырған жумыслар менен танысыў мақсетинде Қоңырат районында болды.

Дәслеп, Жоқарғы Кеңес Баслығы «Елабад» мәҳәллесиндеги «Устюрт стар бизнес» кәрханасы тәрепинен кир жуўыў материалларын ислеп шығарыў жойбары менен жақыннан танысты. Исбилерменниң өнимлерин тек ғана ишки базарға емес, експортқа да бағдарлаў илажларын көриў бойынша жуўапкерлерге тапсырмалар берилди.

Буннан соң, «Алмазар» мәҳәллесинде исбилермен Х.Алланиязов тәрепинен тазаланған суў ислеп шығарыў ҳәм қағазды қайта ислеў жойбары, «Café Collection» кәрханасы тәрепинен жолға қойылған тигиў ҳәм трикотаж өнимлерин ислеп шығарыў жойбары, «Ҳәким ата» мәҳәллесиндеги Мажит Атамуратов тәрепинен мебель ислеп шығарыў жойбары жумыслары барып көрилди.

Сондай-ақ, «АСҚАРТАЙ-АМИНТАЙ» шаңарақлық кәрханасы тәрепинен қолғап ислеп шығарыў, жеке тәртиптеги исбилерменлерден Мажитов Мурат тәрепинен шулық ислеп шығарыў, Сейтмуратов Самат тәрепинен имаратлар фасады ушын термопанел ислеп шығарыў, өнермент Есемуратов Серик тәрепинен саз әсбапларын ислеп шығарыў жойбарлары көзден өткерилди.

Буннан соң, грант қаржылары тийкарында үскенелер алып келинген «Кардио Кунград» кәрханасы, және бир қатар исбилерменлик жойбарларының барысы үйренилди ҳәм исбилерменлерди қоллап-қуўатлаў, олардың өз жумысын кеңейтиўи ушын жақыннан жәрдем бериў бойынша жуўапкерлерге анық тапсырмалар берилди.

Жоқарғы Кеңес Баслығы районда әмелге асырылып атырған жумыслар менен танысыў барысында реновация тийкарында қурылып атырған көп қабатлы үйлердиң қурылысы, сондай-ақ, «Жиңишке» каналы бойында әмелге асырылып атырған жағалық бойы хызметлерин шөлкемлестириў жумысларын барып көрди. Қурылыс жумысларын өз ўақтында, сапалы етип жуўмақлаў бойынша тапсырмалар берилди.