Жоқарғы Кеңес Баслығы Нөкис, Бозатаў, Кегейли, Шымбай, Қараөзек ҳәм Тахтакөпир районлары исбилерменлериниң мүрәжатларын тыңлады
1879
Ҳүрметли Президентимиздиң басшылығында өткерилген видеоселектор мǝжилислеринде аймақларда исбилерменликти раўажландырыў, исбилерменлерди ҳәр тәреплеме қоллап-қуўатлаў, ойландырып атырған машқалаларды сапластырыў, мүрәжатларын унамлы шешип бериў, оларга қолайлы шараятлар жаратыў бағдарында анық тапсырмалар белгилеп берилди.
Әсиресе, бүгинги күнде пандемияның халықтың турмысына ҳәм экономикамызға унамсыз тәсирин жумсартыў мақсетинде карантин талапларына әмел еткен ҳалда кәрханаларды басқышпа-басқыш иске қосыў, халықтың бәнтлигин тәмийинлеў ҳәм дәраматларын арттырыў, исбилерменлерге жеңиллик ҳәм преференцияларды бериў арқалы оларға қолайлы шараятларды жаратыў сыяқлы кең көлемли илажлар алып барылмақта.
Қарақалпақстан Республикасы Жоқарғы Кеңесиниң Баслығы М.Ерниязов исбилерменлердиң мүрәжатларын тыңлаў мақсетинде видеоконференцбайланыс арқалы өткерген нәўбеттеги ушырасыўда мине усылар ҳақкында сөз барды.
Илажда сектор басшылары, министрлик, кǝрхана, мǝкеме ҳәм шөлкемлер, коммерциялық банклердиң басшылары ҳәм тийисли тараў ўәкиллери қатнасты.
Республикамыз басшысы ушырасыўда бүгинги күнде ҳәрекетсиз турган исбилерменлик субъектлериниң ҳәр бири менен ҳәкимлер, сектор басшылары жеке ислесип, биринши нәўбетте олардың жумысын қайта тиклеўдиң илажларын көриўи тийис екенлигин айрықша атап өтти. Бул бағдарда Нөкис, Бозатаў, Кегейли, Шымбай, Қараөзек ҳәм Тахтакөпир районларында алып барылып атырған жумысларды сын көз-қарастан талқылап, жүзеге келген кемшиликлерди қысқа ўақыт ишинде сапластырыў бойынша қатаң тапсырмалар берди.
Видеоконференцияда мүрәжатлардың белгили бир бөлими орнында өз шешимин тапқан болса, қосымша үйрениў ҳәм ўақыт талап ететуғын мүрәжатлар бойынша жуўапкер басшыларға анық тапсырмалар белгилеп берилди.
Қарақалпақстан Республикасы Жоқарғы Кеңесиниң баспасөз хызмети