Kino-koncert zalı paydalanıwǵa tapsırıldı

Usı jıl  16-oktyabr kúni Nókiste zamanagóy kino-koncert zalı paydalanıwǵa tapsırıldı.

Ilajda Qaraqalpaqstan Respublikası Joqarǵı Keńesi Baslıǵınıń orınbasarı A.Hamraev, «Nuranıy» qorı Qaraqalpaqstan Respublikası bóliminiń baslıǵı, Qaraqalpaqstan xalıq jazıwshısı Sh.Usnatdinov, Ózbekstan mámleketlik filarmoniyası Qaraqalpaqstan Respublikası bólimi «Muxalles» duwtarshılar ansambliniń baqsı-sazendesi, Zulfiya atındaǵı mámleketlik sıylıqtıń laureatı U.Orınbaevalar shıǵıp sóylep, Prezidentimizdiń basshılıǵında mádeniyatmız benen kórkem ónerimizdi rawajlandırıw, tarawdıń materiallıq-texnikalıq bazasın bekkemlew, talant iyelerin xoshametlew baǵdarında ámelge asırılıp atırǵan keń kólemli ilajlarǵa toqtap ótti.

Nókis qalasınıń kórkine kórk qosıp turǵan bul imarattı «Invesstroy Nukus» juwapkershiligi sheklengen jámiyetiniń qurılısshıları sapalı etip paydalanıwǵa tapsırdı. Ulıwma 585 orınǵa mólsherlengen koncert zalına iye bul obektte  11 milliard sumlıq qurılıs ońlaw jumısları ámelge asırıldı.

–Derlik 60 jıldan aslam tariyxına iye jámáátimiz xalqımızdıń milliy mádeniyatın tek elimizde emes, bálkim dúnyanıń kóplegen ellerine kórsetip kelmekte, – deydi «Ayqulash» qaraqalpaq mámleketlik milliy folklor ansambliniń direktorı Ayapbergen Allaniyazov. –Jańa imarattıń paydalanıwǵa tapsırılıwı kórkem óner jámáátlerin ayrıqsha quwanıshqa bólep, jańadan-jańa dóretiwshilik tabıslarǵa ruxlandıradı. Keleshekte bul jerde túrli bayram ilajların ótkeriw rejelestirilgen.

Ilaj qatnasıwshıları zamanagóy kino-koncert zalında jaratılǵan sharayatlar menen tanıstı.

Qatnasıwshılarǵa kórkem óner sheberleri hám jas atqarıwshılardıń koncert baǵdarlaması qoyıp berildi.