MOYNAQTA BIR QATAR OBEKTLER PAYDALANÍWǴA TAPSÍRÍLDÍ

Usı jıl 27-noyabr kúni Moynaq rayonında bir qatar jańa obektlerdiń qurılısı pitkerilip, xalıq iygiligi ushın paydalanıwǵa tapsırıldı.
Jańa imaratlardıń ashılıw saltanatında atap ótilgenindey, Ózbekstan Respublikası Prezidenti Shavkat Mirziyoev usı jıldıń 20-21-avgust kúni respublikamızǵa saparı waqtında Moynaq rayonında da bolıp, 2019-2021-jıllarda rayondı kompleksli sociallıq-ekonomikalıq rawajlandırıw boyınsha jańa wazıypalar belgilep bergen edi. Ótken qısqa waqıt ishinde bul baǵdarda aytarlıqtay qurılıs jumısları alıp barıldı.
«Qazaqdárya» awıl puqaralar jıyınında 9-sanlı mektepke shekemgi bilimlendiriw shólkemi jańa imaratınıń paydalanıwǵa tapsırılıwı aymaq tuǵınları ayrıqsha quwanıshqa bóledi. Bıyılǵı jıldıń Investiciyalıq baǵdarlaması kirgizilgen bul imaratta 2 milliard 800 milliard sumlıq qurılıs jumısları orınlandı. Eki qabatlı imaratta balalar ushın barlıq sharayatlar jaratılǵan. Jaqın kúnlerde aymaqta 7-sanlı mektepke shekemgi bilimlendiriw shólkemi jańa imaratınıń paydalanıwǵa tapsırıwı rejelestirilgen.

Rayonda xalıqtı taza ishimlik suwı menen támiyinlew boyınsha bir qatar joybarlar ámelge asırılmaqta. «Qazaqdárya» awıl puqaralar jıyınınıń «Múyten» elatlı punktindegi suwdı dushshılandırıwshı stanciyanıń paydalanıwǵa tapsırılıwı bunıń ayqın mısalı bolıp tabıladı. Jańa stanciyanıń paydalanıwǵa tapsırılıwı menen 520 xojalıq taza ishimlik suwı menen támiyinlendi. Sonday-aq, «Ernazar» hám «Keńes» awıllarındaǵı suw tarmaǵın ońlaw jumısları alıp barıldı.


Qaraqalpaqstan Respublikası Jer resursları hám mámleketlik kadastr basqarması Moynaq rayonlıq bólimi, Qaraqalpaqstan Respublikası jer múlk kadastr mámleketlik kárxanası jámáátleri de jańa imaratqa iye boldı. Rayon orayında boy tiklegen imaratta islewshiler ushın barlıq sharayatlar jaratılǵan. Bul jerde tiykarınan jaslar miynet etpekte.
Usı kúni rayon orayında kurant minarası da paydalanıwǵa tapsırıldı. Ulıwma uzınlıǵı 21 metr bolǵan bul minara eń sulıw imaratlardıń biri boldı. Bıyılǵı jıldıń may ayında qurılıs baslanǵan minara ushın Italiyanıń CANONICO kompaniyasınıń saatları tańlandı. Ayrıqsha qásiyeti, minarada hár saat sayın waqıt bildirilip turıladı.
Rayonda isbilermenlikti rawajlandırıwǵa ayrıqsha itibar qaratılmaqta. «Madeli» awıl puqaralar jıyını aymaǵındaǵı «Shege» awılında nan hám konditer ónimlerin islep shıǵaratuǵın cex iske túsirildi. «Xalıq banki»niń rayonlıq bóliminen «Hár bir shańaraq – isbilermen» Mámleketlik baǵdarlamalsı boyınsha alınǵan 17 million sum kredit esabınan úsh jańa jumıs ornı ashıldı. Keleshekte bul jerde basqa da xızmet kórsetiw orınların ashıw rejelestirilgen.

Prezidentimizdiń usı jıl 7-noyabrdegi «Qaraqalpaqstan Respublikasında sharwashılıq tarmaqların jedel rawajlandırıw ilajları haqqında»ǵı qararınıń orınlanıwın támiyinlew boyınsha rayonda jumıslar baslap jiberildi. Usı kúni rayon orayında hám «Tik ózek» awıl puqaralar jıyınlarında veterinariya shaqapshalarınıń imaratları paydalanıwǵa tapsırıldı. Qánigelerdiń atap ótkenindey, jańa imaratlarda xalıqqa sapalı veterinariyalıq xızmet kórsetiw ushın barlıq sharayatlar jaratılǵan. Usı kúni rayonlıq veterinariya hám sharwashılıqtı rawajlandırıw bólimine Ózbekstan Respublikası Veterinariya hám sharwashılıqtı rawajlandırıw mámleketlik komiteti tárepinen tórt dana skuter mototransportı tapsırıldı.
Jańa imaratlardıń paydalanıwǵa tapsırıw saltanatına Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov qatnastı.