«Parlament oyınları» sport jarıslarınıń jeńimpazları anıqlandı

Nókiste «Parlament oyınları» sport jarıslarınıń Qaraqalpaqstan Respublikası basqıshı bolıp ótti.

Ózbekstan Respublikası Oliy Majlisi Senatı Keńesiniń 2020-jıl 30-dekabrdegi qararına muwapıq, senatorlar hám xalıq deputatları jergilikli Keńesleri deputatları, Senat janındaǵı Jaslar parlamenti aǵzalarınıń denetárbiya hám sport penen turaqlı túrde shuǵıllanıwın támiyinlew,  xalıq arasında salamat turmıs tárizin úgit-násiyatlaw maqsetinde ótkerilip atırǵan «Parlament oyınları» sport jarıslarında qatnasıwshılar sporttıń mini-futbol, voleybol, stol tennisi hámde badminton sıyaqlı túrleri boyınsha bellesti.

Jarıstıń Qaraqalpaqstan Respublikası basqıshı juwmaqlanıp, onıń jeńimpazları menen sıylı orın iyelegen qatnasıwshıların sıylıqlaw máresimi bolıp ótti.

Sıylıqlaw máresiminde Qaraqalpaqstan Respublikası Joqarǵı Keńesi Baslıǵınıń orınbasarı A.Davletov  «Parlament oyınları» sport jarıslarınıń Qaraqalpaqstan Respublikası basqıshı jeńimpazların qutlıqladı hámde Xorezm wálayatında bolıp ótetuǵın aymaqlıq basqıshta jeńiske erisip, respublika basqıshında da joqarı orınlardı iyelewine isenim bildirdi.

«Parlament oyınları» sport jarıslarınıń Qaraqalpaqstan Respublikası basqıshında mini-futbol boyınsha ótkerilgen bellesiwlerde Qaraqalpaqstan Respublikası Joqarǵı Keńesi, voleybol boyınsha ótkerilgen jarıslarda Nókis rayonı komandası, stol tennisi boyınsha erler arasında Joqarǵı Keńes deputatı M.Gaipov, hayal-qızlar arasında xalıq deputatları Qaraózek rayonlıq Keńesi deputatı G.Sidikova, badminton boyınsha hayal-qızlar arasında Joqarǵı Keńes komitet baslıǵı, deputat Z.Reymova birinshi orındı iyelep, Xorezm wálayatında bolıp ótetuǵın aymaqlıq basqıshına jollama aldı.

«Parlament oyınları» sport jarıslarınıń Qaraqalpaqstan Respublikası basqıshı jeńimpazları menen sıylı orın iyelegen qatnasıwshıları shólkemlestiriwshiler tárepinen qımbat bahalı sawǵalar menen sıylıqlandı.

 

 

Qaraqalpaqstan Respublikası Joqarǵı Keńesiniń baspasóz xızmeti