Qaraqalpaqstan Respublikasınıń Konstituciyası baspadan shıqtı

Elimizde ámelge asırılıp atırǵan demokratiyalıq reformalardıń baslı huqıqıy tiykarı, insan huqıq hám erkinlikleriniń isenimli qorǵalıwınıń kepili bolıp esaplanǵan Qaraqalpaqstan Respublikasınıń Konstituciyası 1993-jıl 9-aprel kúni qabıl etilip, búginge deyin bir neshe márte ózgerisler hám qosımshalar kirgizilip, jetilistirilip kelinbekte.

Atap aytqanda, 2021-jıl 12-fevral kúni ótkerilgen Qaraqalpaqstan Respublikası Joqarǵı Keńesiniń on besinshi sessiyasında “Qaraqalpaqstan Respublikasınıń Konstituciyasına ózgerisler hám qosımshalar kirgiziw haqqında”ǵı Qaraqalpaqstan Respublikası Nızamı qabıl etilip, usı nızam tiykarında  Konstituciyaǵa bir qatar ózgerisler hám qosımshalar kirgizilgen edi.

Máselen, Qaraqalpaqstan Respublikası Konstituciyasınıń «Birinshi taraw», «Ekinshi taraw», «Úshinshi taraw», «Tórtinshi taraw», «Besinshi taraw» hám «Altınshı taraw» degen sózlerdegi «taraw» sózi «bólim» sózi menen, 2-statyasındaǵı, 15-statyanıń ekinshi bólimindegi hámde 36-statyası tekstindegi «adamlar» degen sóz «shaxslar» degen sóz benen almastırıldı. 70-statyanıń 11-bánti, sonday-aq, 103 hám 104-statyalar alıp taslandı.

Qaraqalpaqstan Respublikasınıń Konstituciyası qabıl etilgenliginiń 28 jıllıǵı múnásibeti menen “Qaraqalpaqstan” baspası tárepinen basıp shıǵarılǵan Qaraqalpaqstan Respublikasınıń Konstituciyasında áne usı sıyaqlı ózgerisler hám qosımshalar sáwlelengen.

Qaraqalpaqstan Respublikası Joqarǵı Keńesiniń baspasóz xızmeti