12 May 2021 19:05:30
|

Konstituciya bayramına baǵıshlandı

Usı jıl 9-aprel kúni Berdaq atındaǵı Qaraqalpaq mámleketlik akademiyalıq muzıkalı teatrında Qaraqalpaqstan Respublikası Konstituciyası qabıl etilgeniniń 28 jıllıǵına baǵıshlanǵan saltanatlı májilis bolıp ótti.

Oǵan Ózbekstan Respublikası Oliy Majlisi Senatınıń aǵzaları, Joqarǵı Keńestiń deputatları, ministrlikler, mákeme hám kárxanalardıń, oqıw orınlarınıń, huqıq qorǵaw uyımlarınıń basshıları, student-jaslar, jámiyetlik shólkemlerdiń, ǵalaba xabar qurallarınıń wákilleri qatnastı.

Májilisti Qaraqalpaqstan Respublikası Joqarǵı Keńesiniń Baslıǵı M.Kamalov kiris sóz benen ashıp, jıynalǵanlardı Qaraqalpaqstan Respublikası Konstituciyası qabıl etilgeniniń 28 jıllıǵı bayramı menen qutlıqladı.

Ózbekstan hám Qaraqalpaqstan Respublikalarınıń mámleketlik gimnleri jańladı.

Bunnan keyin Qaraqalpaqstan Respublikası Konstituciyalıq baqlaw komitetiniń baslıǵı P.Aytniyazov keń túrde bayanat jasadı.

Atap ótilgenindey, Konstituciya-hár bir mámlekettiń, onıń xalqınıń oy-pikirin, erkin, ruwxıy, jámiyetlik sanasın hám mádeniyatın hár tárepleme sáwlelendiriwshi  Nızam bolıp tabıladı. 1993-jıl 9-aprel kúni qabıl etilgen Konstituciyamız jańa mámleket, jańa jámiyet qurıw, jańadan-jańa imkaniyatlar jaratıwshı tariyxıy hújjet sıpatında qádirlenip kelinbekte. Onıń qabıl etiliwi menen jámiyetlik hám mámleketlik qurılıstıń barlıq tarawlarındaǵı qatnasıqlardı, nızamshılıǵımızdıń barlıq tarawların tártipke salıwshı huqıqıy sistema jaratıldı.

Qaraqalpaqstan Respublikası óziniń nızam menen tastıyıqlanǵan mámleketlik nıshanları-bayraǵına, gerbine hám gimnine iye. Insan máplerin támiyinlewde xalıq penen pikirlesiw, olardıń usınıs hám talapların itibarǵa alıwda olardıń múrájat etiw huqıqına Konstituciyada kepillik berilgenligi áhmiyetli bolıp esaplanadı.

Ilaj kórkem óner sheberleriniń «Íǵbal baxtım-Konstituciyam» atamasındaǵı bayram koncert baǵdarlaması menen juwmaqlandı.

Saltanatlı májiliske Qaraqalpaqstan Respublikası Ministrler Keńesiniń Baslıǵı Q.Sariev qatnastı.

 

D.ABIBULLAEV,

Qaraqalpaqstan xabar agentliginiń sholıwshısı.

M.HÁBIBULLAEV tıń túsirgen súwretleri