ALLAYaR DOSNAZAROV HÁM QARAQALPAQSTANNÍŃ JAŃA TARIYXÍ

8-may kúni paytaxtımızda elimizdiń ullı perzenti, mámleketlik hám siyasiy ǵayratker Allayar Dosnazarovtıń 125 jıllıǵına baǵıshlanǵan “A.Dosnazarov hám Qaraqalpaqstannıń jańa tariyxı” atamasında respublikalıq ilimiy-teoriyalıq konferenciya bolıp ótti.

Dáslep Allayar Dosnazarovtıń byustine gúlsheńber qoyıw máresimi ótkerilip, onda  Ózbekstan Respublikası Oliy Majlisi Senatınıń aǵzaları, Qaraqalpaqstan Respublikası Joqarǵı Keńesiniń deputatları, húkimet aǵzaları, ministrlik hám mákemeler basshıları, respublikamızǵa belgili ilimpazlar, jazıwshı-shayırlar, Allayar Dosnazarovtıń urpaqları, keń jámiyetshilik hámde ǵalaba xabar quralları wákilleri, sonday-aq Qazaqstan Respublikasınan kelgen miymanlar qatnastı.

Qaraqalpaqstan Respublikası Joqarǵı Keńesiniń Baslıǵı Murat Kamalov Allayar Dosnazarovtıń esteligine húrmet kórsetip, byustine gúl qoydı.

 

 

 

Onnań soń Berdaq atındaǵı Qaraqalpaq mámleketlik akademiyalıq muzıkalı teatrında respublikalıq konferenciya shólkemlestirildi.

Konferenciya Allayar Dosnazarov haqqındaǵı hújjetli film kórsetiliwi menen baslandı.

Ilajdı Qaraqalpaqstan Respublikası Joqarǵı Keńesi Baslıǵınıń orınbasarı A.Davletov kiris sóz benen ashıp, sońǵı jılları elimizde Húrmetli Prezidentimizdiń basshılıǵında tariyxımızdı qayta úyreniwge, milliy qádiriyatlarımızdı qayta tiklewge, ásirese, repressiya qurbanları bolǵan el azamatlarınıń atların máńgilestiriwge ayrıqsha itibar qaratılıp, bul baǵdarda keń kólemli jumıslar ámelge asırılıp atırǵanın ayrıqsha atap ótti.

Búgingi kúnde elimizdiń ullı perzenti Allayar Dosnazarovtıń atın máńgilestiriw boyınsha bir qatar ilajlar ámelge asırılmaqta. Atap aytqanda, 2020-jılı paytaxtımız Nókis qalasında babamızdıń byusti ornatılıwı, ullı babamızǵa degen joqarı húrmet hám itibardıń ayqın kórinisi boldı  Usı jıldıń 16-aprel sánesinde Ózbekstan Respublikası Ilimler akademiyası Qaraqalpaqstan bólimi baslaması menen ilimiy konferenciya ótkerilip, ullı babamızdıń ómiri hám miynet jolı haqqında jańa maǵlıwmatlar anıqlandı.

Óziniń qısqa ómiri dawamında Allayar Dosnazarov tereń bilimi hám tájiriybesi, sheber shólkemlestiriwshilik uqıbı, watansúygishligi menen jámiyetshilik arasında keńnen tanılıp, el arasında úlken húrmet hám abıroyǵa eristi.

Ásirese, onıń Qaraqalpaqstan Avtonomiyalı oblastın dúziwdegi ayrıqsha miynetlerin, xalqımızdıń milliy ózgesheliklerin anıqlaw máselelerindegi shólkemlestiriwshilik uqıbın, milliy-mámleketlik shegaralardı belgilewdegi jankúyerligin, sonday-aq, ruwxıy-aǵartıwshılıqtı rawajlandırıw jolındaǵı pidákerlik xızmetlerin qansha maqtanısh etsek te arzıydı.

Konferenciyada akademik N.Ayımbetov, Qaraqalpaqstan xalıq shayırı, senator G.Annaqilicheva, Qaraqlpaqstan xalıq jazıwshısı A.Sultanov, Allayar babamızdıń urpaǵı B.Allambergenov, Qazaqstan Respublikasınan kelgen miymanlar hám basqalar sózge shıǵıp, babamızdıń ómir hám miynet jolı, onıń elimiz tariyxındaǵı tutqan ornı haqqında keńnen toqtalıp ótti.

Qaraqalpaqstan Respublikası Joqarǵı Keńesiniń baspasóz xızmeti