ESLEW BAR EKEN MILLET JASAYDÍ

9-may – Eslew hám qádirlew kúni hámde Ekinshi jer júzilik urısta erisilgen jeńistiń 76 jıllıǵı  belgilendi.

Paytaxtımızda bayram múnásibeti menen ótkerilgen ushırasıw qatnasıwshıları onlayn videobaylanıs arqalı Tashkent qalasında shólkemlestirilgen Eslew hám qádirlew kúni hámde Ekinshi jer júzilik urısta erisilgen jeńistiń 76 jıllıǵına baǵıshlanǵan bayram ilajında qatnastı.

Húrmetli Prezidentimiz ullı Jeńistiń 76 jıllıǵı hámde eslew hám qádirlew kúni múnásibeti menen xalqımızdı qutlıqladı.

Ilajda Qaraqalpaqstan Respublikası Joqarǵı Keńesiniń Baslıǵı M.Kamalov Prezidentimiz hám xalqımızdı bayram menen qutlıqladı.  Elimizde urıs qatnasıwshıları hám miynet frontı veteranlarına ǵamqorlıq kórsetiw, olardı hár tárepleme qollap-quwatlawǵa ayrıqsha itibar qaratılıp atırǵanlıǵın atap ótti.

Prezidentimizdiń usı jıl 20-apreldegi «Ekinshi jer júzilik urıs qatnasıwshıların xoshametlew haqqında»ǵı pármanı tiykarında urıs qatnasıwshıları hám front artı miynet veteranların xoshametlew maqsetinde respublikamızdıń barlıq qala hám rayonlarında qatar ilajlar ámelge asırıldı. Urıs veteranlarınıń halınan xabar alınıp, olarǵa bahalı sawǵalar tapsırıldı.

***

Bayram múnásibeti menen paytaxtımız Nókis qalasındaǵı «Hásiretli ana» esteligi maydanına elimiz basshıları, mámleketlik hám jámiyetlik uyımlar, sonday-aq, keń jámiyetshilik wákilleri toplandı.

Qaraqalpaqstan Respublikası Joqarǵı Keńesiniń Baslıǵı M.Kamalov bayram múnásibeti menen «Hásiretli ana» esteligine gúlsheńber qoyıp, Ekinshi jer júzilik urısta qurban bolǵanlardıń esteligine húrmet kórsetti.

Sonday-aq, Qurallı Kúshler sistemasına kiriwshi strukturalar wákilleri de estelikke gúl qoydı.

Ilajda Watanımız hám tınıshlıǵımız qorǵawshılarınıń áskeriy sap tartıp júriw saltanatı bolıp ótti.

Onnan soń bayram qatnasıwshıları “Watansúyiwshiler baǵı”nıń ashılıw máresiminde qatnastı.

 

Qaraqalpaqstan Respublikası Joqarǵı Keńesi Prezidiumınıń 2019-jıl dekabr ayındaǵı qararı menen tastıyıqlanǵan jol kartası tiykarında qurılǵan baǵ 9-may – Eslew hám qádirlew kúni hámde Ekinshi jer júzilik urısta erisilgen jeńistiń 76 jıllıǵı bayramına ózgeshe sawǵa boldı.

Bul jerde Ekinshi jer júzilik urısta jeńiske erisiwde úlken áhmiyetke iye bolǵan hámde búgingi kúndegi zamanagóy áskeriy texnikalardıń kórgizbesi shólkemlestirildi. Sonıń menen birge, urısta qaza tapqan márt Watan perzentlerine tiyisli maǵlıwmatlar jámlengen «Eslew úyi» de orın alǵan.

Qaraqalpaqstan Respublikası Joqarǵı Keńesiniń baspasóz xızmeti