Balalar – ómirimizdiń quwanıshı, keleshegimiz iyeleri. Olarǵa mehir hám ǵamqorlıq kórsetiw, tárbiya beriw bárshemizdiń insanıylıq minnetimiz.
1-iyun – Xalıqaralıq balalardı qorǵaw kúni múnásibeti menen paytaxtımızdaǵı reabilitaciya orayına iye bolǵan «Imkan» mámleketlik kóp tarmaqlı qánigelestirilgen mektepke shekemgi bilimlendiriw mákemesinde bayram ilajı bolıp ótti.
Ilajda Qaraqalpaqstan Respublikası Joqarǵı Keńesiniń Baslıǵı M.Kamalov, Qaraqalpaqstan Respublikası Prokurorı F.Allambergenov, Mektepke shekemgi bilimlendiriw ministri J.Usnatdinova, Nókis qalası hákimi U.Panaev balalardı bayram menen qutlıqlap, sawǵalar tapsırdı.
Húrmetli Prezidentimiz tárepinen elimizde balalardıń huqıqları menen erkinliklerin qorǵaw, olardıń qábiletlerin júzege shıǵarıwǵa ayrıqsha itibar qaratılmaqta.
Ózbekstan Respublikası Prezidentiniń 2018-jıl 16-avgusttaǵı «Aralboyı regionı balaları ushın reabilitaciya orayına iye bolǵan mámleketlik qánigelestirilgen kóp tarmaqlı mektepke shekemgi bilimlendiriw mákemesin shólkemlestiriw ilajları haqqında»ǵı Qararı tiykarında qurılıp, 2019-jıl paylalanıwǵa tapsırılǵan Reabilitaciya orayına iye bolǵan «Imkan» mámleketlik kóp tarmaqlı qánigelestirilgen mektepke shekemgi bilimlendiriw mákemesi 120 orınǵa mólsherlengen bolıp, búgingi kúnde 118 bala tárbiyalanbaqta. Orayǵa esitiwinde, psixologiyalıq rawajlanıwında hám háreket sistemasında nuqsanı bolǵan 2 jastan 7 jas aralıǵındaǵı balalar qabıllanadı. Sonıń menen birge, 2 jastan 16 jas aralıǵındaǵı balalar hám jas óspirimler de reabilitaciya orayına qatnawına boladı.
Mákemede Rossiya Federaciyasınıń Moskva qalasındaǵı «Balalıq» reablitaciya orayında, Sankt-Peterburg qalasındaǵı A.I.Gercen atındaǵı Rossiya mámleketlik pedagogikalıq universitetinde, Koreya Respublikasında tájiriybe arttırıp kelgen pedagoglar, medicina xızmetkerleri hám defektologlar jumıs alıp baradı.
Házirgi waqıtta bul balalar baqshasında 137 joqarı qánigeliktegi medicina xızmetkerleri hám tájiriybeli pedagog kadrlar korrekciyalıq pedagogika jumısların alıp barmaqta. Bul jerde balalardıń densawlıǵın tiklew, olarǵa bilim hám tárbiya beriw ushın barlıq qolaylıqlar jaratılǵan.
Ilajda baqsha tárbiyalanıwshıları atqarıwındaǵı koncert baǵdarlaması bárshege bayram keypiyatın baǵıshladı.
Qaraqalpaqstan Respublikası Joqarǵı Keńesiniń baspasóz xızmeti