QARAQALPAQSTAN RESPUBLIKASÍ JOQARǴÍ KEŃESINIŃ ON SEGIZINShI SESSIYaSÍ HAQQÍNDA MÁLIMLEME

12-iyun kúni Qaraqalpaqstan Respublikası Joqarǵı Keńesiniń on segizinshi sessiyası bolıp ótti.

Videokonferencbaylanıs tárizinde ótken sessiyaǵa Ózbekstan Respublikası Oliy Majlisi Senatı, Qaraqalpaqstan Respublikası húkimeti aǵzaları, sektorlardıń hám tarawlardıń basshıları, ǵalaba xabar qurallarınıń wákilleri, sonday-aq, Joqarǵı Keńestiń deputatları qala hám rayon studiyalarında qatnastı.

Sessiyanı Qaraqalpaqstan Respublikası Joqarǵı Keńesi Baslıǵınıń orınbasarı  A.Davletov kiris sóz benen ashtı hám basqarıp bardı.

Deputatlar sessiyanıń Sekretariatın sayladı hám kún tártibin tastıyıqladı.

Sessiya májilisi kún tártibindegi dáslepki másele, yaǵnıy «Qaraqalpaqstan Respublikası Konstituciyalıq baqlaw komiteti haqqında»ǵı Qaraqalpaqstan Respublikası Nızamınıń (jańa redakciyada) joybarın kórip shıǵıw haqqında Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri boyınsha komitet baslıǵı Z.Reymova bayanat jasadı.

Atap ótilgenindey, bul Nızam joybarınıń maqseti – Qaraqalpaqstan Respublikası nızamların, joqarı mámleketlik hákimiyat hám basqarıw uyımları aktlerin Qaraqalpaqstan Respublikası Konstituciyasına muwapıqlastırıw boyınsha huqıqıy qatnasıqlardı tártipke salıwdaǵı nızamshılıqtı ele de jetilistiriwge qaratılǵan. Usınılıp atırǵan nızam joybarı V bap hám 45 statyadan ibarat.

Nızam joybarında názerde tutılǵan tiykarǵı ózgerislerdiń biri bul Konstituciyalıq baqlawdı ámelge asırıwdaǵı ulıwma qaǵıydalarǵa, komitet aǵzalarınıń statusına, komitet wákillikleri hám máselelerdi qarap shıǵıwınıń tiykarǵı qaǵıydalarına, komitet jumısın shólkemlestiriw hám onıń xızmetine baylanıslı basqa da máselelerge ele de anıqlıq, ózgeris hám qosımshalar  kirgiziwge qaratılǵan.

Bul másele boyınsha 57-sanlı “Tazajol” saylaw okruginen deputat R.Matqurbanov sózge shıqtı.

Deputatlar bul másele boyınsha tiyisli qarar qabıl etti.

Sessiyada “2017-2021-jıllarda Ózbekstan Respublikasın rawajlandırıwdıń bes áhmiyetli jónelisi boyınsha Háreketler strategiyasın “Jaslardı qollap-quwatlaw hám xalıqtıń salamatlıǵın bekkemlew jılı”nda ámelge asırıwǵa baylanıslı Mámleketlik baǵdarlama tiykarında islep shıǵılǵan ilajlar rejesiniń Qaraqalpaqstan Respublikasında orınlanıwı boyınsha Qaraqalpaqstan Respublikası Ministrler Keńesiniń esabatı tuwralı másele kórip shıǵıldı. Bul másele boyınsha Qaraqalpaqstan Respublikası Ministrler Keńesiniń Baslıǵı Q.Sariev maǵlıwmat berdi.

Sessiya kún tártibinde «Qaraqalpaqstan Respublikası sudı baslıǵınıń orınbasarın saylaw haqkında»ǵı másele kórip shıǵıldı. Bul lawazımǵa Ktaybekov Baxram Qurbanbaevichtiń kandidaturası usınıldı.

Bul másele boyınsha deputatlar tiyisli qarar qabıl etti – Ktaybekov Baxram Qurbanbaevich Qaraqalpaqstan  Respublikası sudı baslıǵınıń ekonomikalıq isler boyınsha orınbasarı lawazımına saylandı.

Sonday-aq, sessiyada «Qaraqalpaqstan Respublikasınıń ayırım nızamlarına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń joybarı tuwralı», «Qala hám rayonlardı sociallıq-ekonomikalıq rawajlandırıwdıń reyting bahalaw kórsetkishleri, ámeliy ilajlar rejeleri hámde bul baǵdarda anıqlanǵan mashqalalardı saplastırıw boyınsha ámelge asırılǵan jumıslar haqqında Qaraqalpaqstan Respublikası Ekonomikalıq rawajlandırıw hám kámbaǵallıqtı qısqartıw ministrliginiń esabatı tuwralı», «Jaslar dápteri»ne kirgizilgen puqaralardıń mashqalaların saplastırıw boyınsha kѳrilip atırǵan ilajlar sheńberinde ámelge asırılǵan jumıslar boyınsha Qaraqalpaqstan Respublikası Ministrler Keńesiniń hámde qala, rayon hákimleriniń esabatları tuwralı», «Ózbekstan Respublikası Oliy Majlisiniń Insan huqıqları boyınsha wákili (Ombudsman)niń Qaraqalpaqstan Respublikasındaǵı aymaqlıq wákiliniń 2021-jıl birinshi sheregi dawamında alıp barılǵan jumısları boyınsha esabatı tuwralı», «Qaraqalpaqstan Respublikası Joqarǵı Keńesiniń ayırım komitetleri hám komissiyası quramına ózgerisler hám qosımshalar kirgiziw tuwralı», «Qaraqalpaqstan Respublikası Joqarǵı Keńesi Prezidiumınıń tiyisli qararların tastıyıqlaw tuwralı» máseleler kórip shıǵılıp, bul boyınsha deputatlar tiyisli qarar qabıl etti.

Usınıń menen Qaraqalpaqstan Respublikası Joqarǵı Keńesiniń on segizinshi sessiyası óz jumısın juwmaqladı.

Qaraqalpaqstan Respublikası Joqarǵı Keńesiniń baspasóz xızmeti
M.Habibullaev túsirgen súwretler