Qol urısı boyınsha xalıqaralıq turnir bolıp ótti

2-iyun kúni Nókis qalasındaǵı Amfiteatrda qol urısı boyınsha professional sportshılar arasında xalıqaralıq turnir bolıp ótti.

Turnirde elimiz sportshıları menen birge Rossiya, Belarus, Ukraina, Ázerbayjan hámde Kamerunnan kelgen qol urısı sheberleri bellesti.

Dáslep turnirdiń saltanatlı ashılıw máresimi shólkemlestirildi. Onda Qaraqalpaqstan Respublikası Joqarǵı Keńesiniń Baslıǵı M.Kamalov, húkimet aǵzaları, turnirdi shólkemlestirgen ministrlik hám mákemeler wákilleri qatnastı.

Ózbekstan hám Qaraqalpaqstan Respublikası mámleketlik gimnleri atqarıldı.

Máresimde sózge shıqqanlar elimizde Prezidentimiz tárepinen sporttı rawajlandırıw, ósip kiyatırǵan jas áwladtı hár tárepleme salamat insanlar bolıp er jetiwin támiyinlew, jas sportshılardı qollap-quwatlawǵa ayrıqsha itibar qaratılıp atırǵanlıǵın atap ótti hám sportshılarǵa áwmet tiledi.

Turnirdiń dáslepki bellesiwi 65 kilogramm salmaqtaǵı sportshılar arasında boldı. Onda jerlesimiz, qol urısı boyınsha eki márte Ózbekstan chempionı, xalıqaralıq turnirlerdiń sıylı orın iyesi Nurpeys Qarlıbaev ázerbayjanlı sportshı, xalıqaralıq turnirler hám jáhán chempionatı sıylı orın iyesi Ruslan Mammadovtı jeńdi.

Turnirdiń 75 kilogramm salmaqtaǵı sportshılar arasındaǵı bellesiwde jerlesimiz, qol urısı boyınsha eki márte Ózbekstan chempionı, xalıqaralıq turnirlerdiń sıylı orın iyesi Sherzad Jumanazarov kamerunlı sportshı Rushie Shaneldi múddetinen aldın jeńgen bolsa, usı salmaq kategoriyasındaǵı titullıq bellesiwde  qol urısı boyınsha Aziya hám jáhán chempionı Jahongir Jumaev belaruslı Artyom Buloichukti nokautqa ushırattı.

Sportshılarımızdı  Qaraqalpaqstan Respublikası Joqarǵı Keńesiniń Baslıǵı M.Kamalov qutlıqlap, olarǵa pul sıylıqları menen estelik sawǵaların tapsırdı.

Sonday-aq, turnirde Maftuna Quvondiqova rossiyalı Diana Saadullaevanıń, Shaxboz Tursunov rossiyalı Arsen Mutachevtiń, Olim Normurodov ukrainalı Anatoliy Jurakievskiydiń ústinen jeńiske eristi.

Qaraqalpaqstan Respublikası Joqarǵı Keńesiniń baspasóz xızmeti