JOQARǴÍ KEŃESTE QABÍLLAW

Qaraqalpaqstan Respublikası Joqarǵı Keńesiniń Baslıǵı Murat Kamalov 19-iyul kúni “Diplomatic World” jurnalı atqarıwshı direktorı Barbara Ditrix hám “Diplomatic World Institute” orayı menedjeri Alberto Turkstranı qabılladı.

Ushırasıwda Joqarǵı Keńes Baslıǵı M.Kamalov miymanlardı respublikamızǵa saparı menen qutlıqlap, húrmetli Prezidentimiz tárepinen elimizde ámelge asırılıp atırǵan sociallıq-ekonomikalıq reformalar haqkında maǵlıwmat berdi.

Atap ótilgenindey, Qaraqalpaqstan Respublikasında sońǵı jıllarda barlıq tarawlarda úlken ózgeris hám jańalanıwlar júz bermekte. Ásirese, qala hám rayonlarımızdı hár tárepleme rawajlandırıw, xalıqtıń turmıs sharayatın jaqsılaw, awıl xojalıǵı, kishi biznes hám isbilermenlik, turizm tarawların jánede qollap-quwatlaw, Aralboyındaǵı ekologiyalıq mashqalalardı sheshiw boyınsha bir qatar hújjeler qabıl etilip, anıq ilajlar ámelge asırılmaqta.

Prezidentimizdiń 2020-jıl 2-oktyabrdegi Qaraqalpaqstan Respublikasına saparı dawamında respublikanı rawajlandırıw boyınsha bir qatar wazıypalardı belgilep bergeni hámde 11-noyabr kúngi “Qaraqalpaqstan Respublikasın kompleksli sociallıq-ekonomikalıq rawajlandırıw ilajları haqqında”ǵı qararınıń qabıl etilgeni Qaraqalpaqstan Respublikasınıń sociallıq-ekonomikalıq, sonıń ishinde, óndirislik hám investiciyalıq potencialınan nátiyjeli paydalanıw, aymaqta injenerlik-kommunikaciya, sociallıq hám óndirislik infrastrukturalardı jaqsılaw, ekonomika tarmaqların turaqlı rawajlandırıw, sol tiykarda xalıqtıń bántligin támiyinlew hám turmıs dárejesin arttırıwǵa xızmet etpekte.

2021-jıl 18-may kúni Birlesken Milletler Shólkemi Bas Assambleyasınıń 75-sessiyası jalpı májilisinde Ózbekstan Respublikası  Prezidenti Shavkat Mirziyoev tárepinen usınılǵan Aralboyı regionın ekologiyalıq innovaciyalar hám texnologiyalar aymaǵı, dep járiyalaw haqqındaǵı arnawlı rezolyuciyanıń qabıl etiliwi Aralboyı regionındaǵı ekologiyalıq, sociallıq, ekonomikalıq hám demografiyalıq jaǵdaydı jaqsılawǵa qaratılǵan regionallıq ilajlardı ámelge asırıw, aymaǵımızdıń tábiyatın tiklew hám jaqsılaw, tábiyǵıy resurslardı saqlaw hám xalıqtıń turmıs sapasın arttırıw baǵdarındaǵı jumıslardı jáne de joqarı basqıshta dawam ettiriwde úlken áhmiyetke iye tariyxıy waqıya boldı.

Miymanlar jıllı júzlilik penen qabıl etkeni ushın óz minnetdarshılıǵın bildirip, kóp jıllar dawamında Aral teńiziniń qurıwınıń unamsız aqıbetleri menen gúresip kiyatırǵan respublikada búgingi kúnde ámelge asırılıp atırǵan jumıslarǵa joqarı baha berdi. Sonıń menen birge, Ózbekstannıń Belgiyadaǵı elshixanası basshıları menen erisilgen kelisim boyınsha 2021-jıl sentyabrde Ózbekstan Respublikası Ǵárezsizliginiń 30 jıllıǵına baǵıshlanǵan jurnaldıń arnawlı sanı basıp shıǵarılatuǵını, onda Qaraqalpaqstan Respublikasında Aral teńiziniń qurıwı menen baylanıslı tábiyiy apattıń aqıbetlerin saplastırıw, aymaqtı ekologiyalıq innovaciyalar hám texnologiyalar zonasına aylandırıw, turizmdi rawajlandırıw, respublikaǵa sırt el investiciyaların tartıw, energetika salasın rawajlandırıw  boyınsha alıp barılıp atırǵan jumıslar haqqında material tayarlawdı rejelestirip atırǵanlıǵın atap ótti.

“Diplomatic World” jurnalı siyasat, diplomatiya, biznes, finans, kórkem óner hám mádeniyat tarawların keńnen jarıtıp kelmekte. Jurnal Evropanıń parlament aǵzaları, Evropa Awqamı basshıları, isbilermenler, diplomatik korpus hám Bryusselde akkreditaciyadan ótken xalıqaralıq shólkemlerge tarqatıladı.

Qabıllawda keleshekte birge islesiwdi bunnan bılay rawajlandırıw boyınsha óz-ara pikir almasıwlar boldı.

Belgiyalı miymanlar Qaraqalpaqstanǵa saparı dawamında I.V.Savickiy atındaǵı Qaraqalpaq mámleketlik kórkem óner muzeyine sayaxat etiwi hám Moynaq rayonı menen tanısıwı rejelestirilgen.

Qaraqalpaqstan Respublikası Joqarǵı Keńesiniń baspasóz xızmeti

M.Habibullaev túsirgen súwretler