100 student hayal-qızlardıń bir jıllıq shártnama tólemleri tólep beriledi

Qaraqalpaqstan Respublikası Joqarǵı Keńesi Prezidiumınıń 2021-jıl 19-iyul kúni qabıl etilgen arnawlı qararı tiykarında joqarı oqıw orınlarında shártnama tiykarında bilim alıp atırǵan ata-anasınan yamasa olardıń birinen ayırılǵan sociallıq qorǵawǵa mútáj qızlar hám baǵıwshısınan ayırılǵan jalǵız baslı hayal-qızlarǵa bir jıllıq shártnama tólemleri tólep beriliwi belgilendi.

Húrmetli Prezidentimizdiń basshılıǵında kem támiyinlengen shańaraqlardı, sociallıq járdemge mútáj puqaralardı qollap-quwatlaw boyınsha iygilikli jumıslar ámelge asırılmaqta, ásirese, hayal-qızlardıń mashqalaların saplastırıw, olardı hár tárepleme qollap-quwatlawǵa ayrıqsha itibar qaratılmaqta.

Ózbekstan Respublikası Prezidentiniń basshılıǵında 2021-jıl 26-fevral kúni bolıp ótken hayal-qızlar mashqalaların saplastırıw, olardı sociallıq qollap-quwatlawda mámleketlik uyımlardıń juwapkershiligin arttırıw máselelerine baǵıshlanǵan  videoselektor májlisinde ata-anasınan yamasa olardıń birinen ayırılǵan sociallıq qorǵawǵa mútáj, baǵıwshısınan ayırılǵan jalǵız baslı hayal-qızlardıń bazalıq tólemli – kontrakt muǵdarın tólep beriw wazıypası belgilep berilgen edi.

Usı tapsırmanıń orınlanıwın támiyinlew maqsetinde Qaraqalpaqstan Respublikası Joqarǵı Keńesi Prezidiumınıń qararı qabıl etildi.

Qararǵa muwapıq, qala hám rayonlardan joqarı oqıw orınlarında shártnama tiykarında bilim alıp atırǵan 100 student – ata-anasınan yamasa olardıń birinen ayırılǵan sociallıq qorǵawǵa mútáj qızlar hám baǵıwshısınan ayırılǵan jalǵız baslı hayal-qızlarǵa 2021/2022-oqıw jılı ushın bir jıllıq shártnama tólemleri tólep beriledi. Bunıń ushın  zárúr bolǵan 640 million swmnan aslam qarjı ajıratılıp, shártnama tólemleriniń tolıq tólep beriliwin támiyinlew hámde ajıratılǵan qarjılardıń maqsetli jumsalıwın qadaǵalaw boyınsha tiyisli ministrlik hám joqarı oqıw orınlarına wazıypalar berildi.

Qaraqalpaqstan Respublikası Joqarǵı Keńesiniń baspasóz xızmeti