Zaynab Dayıbekova Tokio Olimpiadasın tariyxıy nátiyje menen juwmaqladı

Tokio Olimpiadasında qılıshpazlıq sport túri boyınsha qatnasqan jerlesimiz Zaynab Dayıbekova sablya baǵdarında ótkerilgen bellesiwlerde yaponiyalı Aoki Chikanı 15:9, qıtaylı Yaci Shaonı 15:10, koreyalı Jisun Yundı 15:12 esabında jeńip, Olimpiadanıń sherek final basqıshına deyin jetip bardı.

Jas sportshımızdıń erisken nátiyjesi mámleketimiz ushın jazǵı Olimpiya oyınlarındaǵı tariyxıy nátiyje, dep ayta alamız.

Ózbekstanlı sportshılar jazǵı Olimpiya oyınlarında 1996-jıldan baslap ǵárezsiz mámleket sportshıları sıpatında qatnasıp kelmekte. Vikipediyadan alınǵan maǵlıwmatlar boyınsha, 2000-jılǵı Sidney Olimpiadasında Anisa Petrova (29 jasında), hám 2012-jılǵı London Olimpiadasında Ruslan Kudaev (32 jasında) qılıshpazlıq boyınsha qatnasqan. Qılıshpazlıqtıń shpaga bellesiwlerinde A.Petrova 1/32 finalda, R.Kudaev 1/8 finalda jeńiliske ushıraǵan.

Tokio Oimpiadasında qılıshpazlıq sport túri boyınsha Sherzad Mamutov (19 jas), Malika Hakimova (25 jas) hám Zaynab Dayıbekova (18 jas) óz qábiletin kórsetti.

Zaynab Dayıbekova mámleketimiz sportı tariyxında Olimpiadada qılıshpazlıq sport túri boyınsha qatnasqan eń jas sportshı, sablya baǵdarında qatnasqan hám sherek finalǵa deyin jetip barǵan eń birinshi sportshı qız retinde orın aldı.

18 jaslı Zaynab Dayıbekova úlken nátiyjelerge erisip kiyatırǵan qábiletli sportshılardan biri. Onıń keleshekte kóplegen jeńislerdi, Olimpiada medalların qolǵa kirgiziwine bekkem isenemiz.

Qaraqalpaqstan Respublikası Joqarǵı Keńesiniń baspasóz xızmeti