Xalıqtıń múrájatları menen islesiw máselesi dodalandı

28-iyul kúni Qaraqalpaqstan Respublikası Joqarǵı Kenesinde Ózbekstan Respublikası Oliy Majlisi Senatınıń Aralboyı regionın rawajlandırıw máseleleri komiteti menen birgelikte Prezident Shavkat Mirziyoevtiń basshılıǵında 23-iyul kúni xalıq múrájatları menen islesiw sistemasın jańasha shólkemlestiriw ilajları boyınsha ótkerilgen videoselektor májilisinde belgilep berilgen wazıypalardıń orınlanıwın támiyinlew máselelerine baǵıshlanǵan májilis ótkerildi.

Májilisti Qaraqalpaqstan Respublikası Joqarǵı Keńesi Baslıǵınıń orınbasarı A.Davletov ashtı hám basqarıp bardı.

Atap ótilgenindey, Prezident Shavkat Mirziyoevtiń basshılıǵında 23-iyul kúni xalıq múrájatları menen islesiw sistemasın jańasha shólkemlestiriw ilajları boyınsha ótkerilgen videoselektor májilisinde xalıqtıń múrájatları menen islesiwdiń búgingi jaǵdayı ministrlik hám aymaqlar kesiminde dodalanıp, bul boyınsha bir qatar áhmiyetli wazıypalar belgilep berildi.

Usı wazıypalardan kelip shıqkan halda búgingi kúnde xalıqtıń múrájatları menen islesiw boyınsha barlıq juwapker ministrlik, mákeme hám shólkemler, sektor basshılarınan ibarat isshi topar dúzildi. Isshi topar qala hám rayonlarǵa, ásirese, shetki máhálle hám awıllarǵa 15 kúnlik mobilizaciyalanıp, múrájatlardı ornında unamlı sheshiw ilajların kóriw belgilendi. Tastıyıqlanǵan grafikler tiykarında háptesine keminde 2 kún alıs, shetki, awır hám mashqalalı aymaqlarda kóshpeli qabıllawlar shólkemlestiriw jolǵa qoyıldı, belgili bir múddet talap etiletuǵın hám qarjılandırıw zárúr bolǵan múrájatlardı sheshiw boyınsha Rayon, Qaraqalpaqstan Respublikası hám Respublika dárejesine qarap, “Jol kartaları”n islep shıǵıw hám orınlanıwın ayrıqsha qadaǵalawǵa alıw belgilep alındı.

Májiliste Ózbekstan Respublikası Oliy Majlisi Senatınıń Aralboyı regionın rawajlandırıw máseleleri komiteti baslıǵı B.Alixonov, Ózbekstan Respublikası Prezidentiniń Qaraqalpaqstan Respublikasındaǵı xalıq qabıllawxanası baslıǵı S.Xudaybergenov, Qaraqalpaqstan Respublikasındaǵı Ózbekstan Respublikası Bas ministriniń Isbilermenler múrájatların kórip shıǵıw qabıllawxanası baslıǵı R.Aytmuratov hám basqalar búgingi kúnde xalıqtan kelip túsken múrájatlardıń sheshiliw jaǵdayı, bul boyınsha ámelge asırılatuǵın jumıslar hám áhmiyetli wazıypalar haqkında toqtalıp ótti.

Xalıq hám Virtual qabıllawxanalarǵa puqaralar tárepinen usı jıldıń yanvar-iyun aylarında jámi 33 mıń 934 múrájatlar kelip túsip, ótken jıldıń usı dáwirine salıstırǵanda 2 esege kóbeygen. Sonnan 7276 múrájat, yaǵnıy 21 procenti unamlı sheshilgen. Kelip túsken múrájatlar tarawlar kesiminde tallanǵanda puqaralar kóbirek xalıqtıń bántligin támiyinlew, kredit ajıratıw, materiallıq járdem hám napaqa, elektr hám gaz, densawlıqtı saqlaw máselelerinde  múrájatlar etkenligi anıqlanǵan.

Sonday-aq, Qaraqalpaqstan Respublikasındaǵı Ózbekstan Respublikası Bas ministriniń Isbilermenler múrájatların kórip shıǵıw qabıllawxanalarına 2021-jıldıń yanvar-iyun aylarında 1640 másele boyınsha 1534 múrájat kelip túsken. Sonnan, 1607 (98,0%) múrajat sheshilgen.

Májiliste bildirilgen pikir hám usınıslar keńnen dodalandı, xalıqtıń múrájatları menen islesiwde deputatlardıń ornı hám juwapkershiligin arttırıw, olardıń ózleri saylanǵan aymaqtaǵı mashqalalar tiyisli ministrlik hám hákimlikler tárepinen qay dárejede sheshilip atırǵanlıǵın turaqlı túrde úyrenip, qadaǵalap barıw, xalıqtıń múrájatları menen islesiw, mashqalalardı unamlı sheshiw, ásirese, shetki aymaqlardaǵı xalıqtıń jasaw sharayatın úyreniw hám jaqsılaw máselesine itibar qaratıwı zárúrligi ayrıqsha atap ótildi.

Qaraqalpaqstan Respublikası Joqarǵı Keńesiniń baspasóz xızmeti
M.Habibullaev alǵan súwretler