Búgin «Ózbekstan» xalıqaralıq ánjumanlar sarayında Prezident Shavkat Mirzieyovtiń mámleketimiz isbilermenleri menen ushırasıwı bolıp ótti.

Ushırasıwda ánjumanlar sarayında 600 ge shamalas isbilermen, aymaqlardaǵı studiyalarda bolsa jámi 10000 ǵa shamalas isbilermenler qatnastı. Onda Prezidentimiz isbilermenlikti qollap-quwatlaw, sistemalı mashqalalardı saplastırıw ilajların dodaladı, isbilermenlerdiń usınısların tıńladı.

Usı ilaj aldında mámleketimiz basshısınıń «Mámleketimizde isbilermenlik ortalıǵın rawajlandırıwǵa múnásip úles qosıp kiyatırǵan isbilermenlerdiń bir toparına minnetdarshılıq bildiriw haqqında»ǵı biyligi járiyalandı.

Biylikke muwapıq, ekonomikamızdıń hám elimizdiń turaqlı rawajlanıwı, isbilermenlik ortalıǵın jaqsılaw, respublikamızdıń eksport potencialın arttırıw, jańa jumıs orınların jaratıw, byudjet turaqlılıǵın támiyinlew jáne xalıqtı sociallıq qollap-quwatlawda múnásip úles qosıp kiyatırǵan isbilermenlerge minnetdarshılıq bildirildi.

Olar arasında Qaraqalpaqstan Respublikasınan «Karakalpaksement» JShJ baslıǵı Sh.Azizov, «Atiyaj-gulzar» JShJ baslıǵı A.Mustafaev «Eń kóp jumıs orınların jaratqan isbilermen» sıpatında, «Stroy vektor plus» jeke menshik kárxanasınıń baslıǵı I.Panaev, «Titan cement» JShJ qospa kárxanasınıń baslıǵı B.Nurlıbaeva «Eń jaqsı salıq tólewshi» sıpatında, «To’rtko’l shisha idishlari» JShJ baslıǵı X.Yuldashev «Eń jaqsı eksportyor» sıpatında Ózbekstan Respublikası Prezidentiniń minnetdarshılıq xatın aldı.

Qaraqalpaqstan Respublikası Joqarǵı Keńesiniń Baslıǵı M.Kamalov «Atiyaj-gulzar» JShJ baslıǵı A.Mustafaev, «Stroy vektor plus» jeke menshik kárxanasınıń baslıǵı I.Panaev  hám «Titan cement» JShJ qospa kárxanasınıń baslıǵı B.Nurlıbaevaǵa Prezidentimizdiń minnetdarshılıq xatların tapsırdı.

Qaraqalpaqstan Respublikası Joqarǵı Keńesiniń baspasóz xızmeti