MÁMLEKETLIK SÍYLÍQLAR TAPSÍRÍLDÍ

Qaraqalpaqstan Respublikası Joqarǵı Keńesi Prezidiumınıń qararına muwapıq, elimiz ǵárezsizligin bekkemlewdegi, onıń ekonomikalıq potencialın arttırıwdaǵı, tarawlarda júrgizilip atırǵan reformalardı tabıslı ámelge asırıwdaǵı nátiyjeli xızmetleri, elimizdi hár tárepleme rawajlandırıw hám xalqımızdıń abadan turmısın támiyinlew jolındaǵı pidákerli miynetleri, jámiyetimizde milletleraralıq doslıq hám tatıwlıqtı bekkemlew, jas áwladtı watandı súyiwshilik hám ǵárezsizlik ideyalarına sadıqlıq ruwxında tárbiyalaw hámde jámiyetlik-siyasiy turmıstaǵı belsendiligi ushın bir topar watanlaslarımız húrmetli ataqlar hám kókirek belgileri menen sıylıqlanǵan edi.

Qaraqalpaqstan Respublikası Joqarǵı Keńesinde 1-sentyabr kúni usı sıylıqlardı tapsırıw máresimi boldı.

Saltanatlı ilajda Qaraqalpaqstan Respublikası Joqarǵı Keńesiniń Baslıǵı M.Kamalov elimiz ǵárezsizliginiń 30 jıllıǵı menen qızǵın qutlıqladı.

Atap ótilgenindey, Húrmetli Prezidentimiz tárepinen elimizdiń social-ekonomikalıq turmısında úlken reformalar, ózgerisler ámelge asırılmaqta. Mámleket basshısınıń respublikamızǵa bolǵan ayrıqsha itibarı jáne ǵamqorlıǵınıń nájiyjesinde barlıq aymaqlarda keń kólemli qurılıs hám abadanlastırıw jumısları, xalkımızdıń abadan turmısın támiyinlew boyınsha bir qatar áhmiyetli ilajlar alıp barılmaqta.

Áne usınday iygilikli islerde belsene qatnasqan bir topar watanlaslarımız elimizdiń joqarı sıylıqların alıwǵa miyassar bolmaqta.

Ilajda hurmetli ataqlar, kókirek belgileri óz iyelerine tapsırıldı.

Sıylıqlanǵanlar atınan sózge shıqqanlar miynetlerin joqarı bahalaǵanı ushın respublikamız basshılarına sheksiz minnetdarshılıq bildirdi.

Ilajda Qaraqalpaqstan Respublikası Joqarǵı Keńesi Baslıǵınıń orınbasarı A.Davletov qatnastı.

Qaraqalpaqstan Respublikası Joqarǵı Keńesiniń baspasóz xızmeti