ERKINLIGIMIZ, ABADAN HÁM BAXÍTLÍ TURMÍSÍMÍZ TÍMSALÍ

Paytaxtımızdaǵı Amfiteatrda elimiz ǵárezsizliginiń 30 jıllıǵına baǵıshlanǵan «Jańa Ózbekstanda erkin hám abadan jasayıq!» súreni astında bayram saltanatı bolıp ótti.

Onda Ózbekstan Respublikası Oliy Majlisi Senatı aǵzaları, Qaraqalpaqstan Respublikası Joqarǵı Keńesiniń deputatları, húkimet aǵzaları, sektor basshıları, ministrlik hám shólkemler, keń jámiyetshilik wákilleri, ǵalaba xabar quralları xızmetkerleri qatnastı.

Saltanatlı ilajdı Qaraqalpaqstan Respublikası Joqarǵı Keńesiniń Baslıǵı M.Kamalov ashıp, gúllán xalqımızdı eń ullı, eń muqaddes bayram – elimiz ǵárezsizliginiń 30 jıllıq bayramı menen shın kewilden qutlıqladı.

Atap ótilgenindey, elimizde Xurmetli Prezidentimiz basshılıǵında ótken qısqa waqıt ishinde barlıq aymaqlar qatarında Qaraqalpaqstanda da keń kólemli reformalar ámelge asırılıp, elimizdi social-ekonomikalıq jaqtan rawajlandırıwǵa ayrıqsha itibar qaratılmaqta.

Sońǵı bes jılda elimizde kishi biznes hám isbilermenlik, sanaat, xızmet kórsetiw hám awıl xojalıǵı tarawlarında bir qatar investiciyalıq joybarlar ámelge asırıldı. Bunıń nátiyjesinde xalqımız ushın jańa jumıs orınları jaratılıp, bir qatar iri óndiris kárxanaları, kóplegen sociallıq obektler iske tusti.

Xalqımızdı sociallıq jaqtan qollap-quwatlaw maqsetinde “Temir dápter”, “Hayallar dápteri”, “Jaslar dápteri” jolǵa qoyıldı.

Jaslardıń bántligin támiyinlew, olardı kásip-ónerge hám isbilermenlikke úyretiw, hár tárepleme qollap-quwatlaw, olardıń qábiletin júzege shıǵarıw baǵdarında bir qansha ilajlar ámelge asırılmaqta.

Óz náwbetinde jaslarımız bunday itibar hám ǵamqorlıqqa juwap retinde hár túrli tarawlarda joqarı tabıslardı qolǵa kirgizbekte.

Atap aytqanda, jaqında Yaponiyada bolıp ótken Olimpiya oyınlarında 4 sportshımızdıń qatnasqanı, bir qatar jaslarımızdıń mámleketlik sıylıqlar menen sıylıqlanǵanı bunıń ayqın dálili bolıp esaplanadı.

…Ózbekstan hám Qaraqalpaqstan Respublikaları mámleketlik gimnleri atqarıldı.

Ilajda Olimpiya oyınlarında qatnasqan sportshılarımız hám olardıń trenerlerine Qaraqalpaqstan Respublikası Joqarǵı Keńesi Prezidiumınıń qararına muwapıq, mámleketlik sıylıqlar, sonday-aq, sportshılarǵa Qaraqalpaqstan Respublikası Joqarǵı Keńesi tárepinen pul sıylıqları tapsırıldı.

Saltanatlı bayram ilajı koncert baǵdarlaması menen dawam etti. Baǵdarlamadan orın alǵan kórkem óner sheberleri hám jas talant iyeleri atqarıwındaǵı Watan, doslıq, tınıshlıq hám tatıwlıq, jaslıq haqkındaǵı qosıqlar hám ayaq oyınlar jıynalǵanlarǵa kóterińki keypiyat baǵıshladı.

 Qaraqalpaqstan Respublikası Joqarǵı Keńesiniń baspasóz xızmeti