Sport hápteligi juwmaqlandı

Respublikamızda «Olimpiada kúni»ne baǵıshlanǵan sport hápteligi keń túrde belgilendi. Ilaj sheńberinde Nókis qalasında hám rayonlarda sport jarısları, belgili sportshılar hám veteranlar menen ushırasıwlar ótkerildi.

Nókis qalasındaǵı Amfiteatrda sport hápteliginiń juwmaǵına baǵıshlanǵan ilaj bolıp ótti. Onda Qaraqalpaqstan Respublikası Joqarǵı Keńesi Baslıǵınıń orınbasarı A.Hamraev shıǵıp sóylep, jıynalǵanlardı «Olimpiada kúni» hám sport hápteligi menen Qaraqalpaqstan Respublikası Joqarǵı Keńesi hám Ministrler Keńesi atınan qutlıqladı.

Atap ótilgenindey, respublikamız aymaǵında ǵalabalıq sport ilajların ótkeriw boyınsha kalendar rejege muwapıq, bıyılǵı dıldıń ótken altı ayı dawamında qala hám rayon hákimlikleri, mámleketlik hám mámleketlik emes shólkemler menen birgelikte 1552 túrli sport jarısı ótkerildi. Olarda 118255 puqara hám sportshı qatnastı. Sonıń nátiyjesinde bıyılǵı jılı Ózbekstan chempionatlarında jeńimpaz bolǵan 28 sportshı joqarı oqıw orınlarına imtixansız qabıl etiletuǵın boldı.

Respublikamızdan Ózbekstan saylandı komandasınıń quramına 422 sportshı (sonnan 231 qız) qabıl etilgen. Sportshılarımız bıyılǵı jıldıń ótken ayları dawamında jáhán, Aziya hám Ózbekstan chempionatlarında, xalıqaralıq turnirlerdi 611 medaldı qolǵa kirgizdi.

Ózbekstan Respublikası Prezidentiniń 2017-jıl 9-marttaǵı «2020-jılı (Yaponiya) Tokio qalasında bolıp ótetuǵın XXXII jazǵı Olimpiada hám XVI Paralimpiada oyınlarına Ózbekstan sportshıların tayarlaw haqqında»ǵı qararınıń orınlanıwın támiyinlew boyınsha respublikalıq komissiya dúzildi. Sonday-aq, Olimpiada sport túrlerin rawajlandırıw boyınsha 2017-2020-jıllarǵa mólsherlengen Baǵdarlama islep shıǵıldı.

Qábiletli sportshılardı tańlap alıw maqsetinde. qala hám rayon aymaqlarında respublikalıq jarıs ótkerilip, saylandı komanda quramına qabıl etilgen sportshılar menen turaqlı oqıw-shınıǵıwları ótkerilmekte.

2020-jılı Tokio qalasında bolıp ótetuǵın XXXII jazǵı Olimpiada oyınlarına respublikamızdan 31, XVI Paralimpiada oyınlarına 2 sportshı jollama alıw ushın jarıslarǵa qatnaspaqta.

Ilajda sport hápteligine belsene qatnasıp, nominaciya jeńimpazları dep tabılǵan Taqıyatas rayonındaǵı 15-sanlı Mektepke shekemgi bilimlendiriw mákemesine, Nókis qalasındaǵı 1-sanlı Balalar hám jas óspirimler sport mektebine, Nókis qalasındaǵı 24-sanlı ulıwma bilim beriw mektebine, Qaraqalpaqstan Respublikası Joqarǵı Keńesi hám Ministrler Keńesi atınan sawǵalar tapsırıldı.

-Elimizde jaslardıń sport penen shuǵıllanıwı ushın barlıq sharayatlar jaratılǵan,-deydi «Mard wǵlon» mámleketlik sıylıǵınıń iyesi, awır atletika boyınsha Aziya chempionı Alisher Radjapov.-Keleshekte jáhán chempionatlarına, Olimpiada oyınlarına qatnasıwdı aldıma maqset etip qoyǵanman.

Ilaj respublikamız kórkem óner sheberleriniń gala koncerti menen juwmaqlandı.