Joqarǵı Keńes Baslıǵı «SHuqırqaq» turǵınlarınıń halınan xabar aldı

Bárshemizge málim, búgingi kúnde Húrmetli Prezidentimizdiń tapsırmasına muwapıq, xalıqtıń, ásirese, eń shetki aymaqlarda jasap hám miynet etip atırǵan insanlardıń halınan xabar alıp, olardıń turmısında ushırasıp atırǵan másele hám mashqalalardı unamlı sheshiw baǵdarında keń kólemli jumıslar ámelge asırılmaqta.

Usı jıldıń 6-avgust kúni Qaraqalpaqstan Respublikası Joqarǵı Keńesiniń Baslıǵı M.Er­niya­zov Nókis qalasınan 230 km den aslam qashıqlıqta jaylasqan Ellikqala rayonınıń «SHuqırqaq» awıl puqaralar jıyını turǵınlarınıń halınan xabar aldı.

Jergilikli xalıq penen bolıp ótken ushırasıwǵa ministrlikler menen ve­domstvolardıń, huqıq qorǵaw uyımlarınıń, rayon hákimliginiń basshıları, jámiyetlik shólkemlerdiń hám ǵalaba xabar qurallarınıń wákilleri qatnastı.

Prezidentimizdiń basshılıǵında «Xalıq mámleketlik uyımlarǵa emes, al, mámleketlik uyımlar xalıqqa xızmet etiwi tiyis», degen princip tiykarında ótkerilip kiyatırǵan kóshpeli qabıllawlar xalqımızdıń kúndelikli turmısında ushırasıp atırǵan hár qanday mashqalalardıń orınlarda unamlı sheshiliwine, solay etip, olardıń búgingi kúnnen razı bolıp jasawına xızmet etpekte.

«SHuqırqaq» awıl puqaralar jıyınında búgingi kúnde 700 den aslam aslam xalıq jasaydı. Awıl puqaralar jıyını 2002-jılı shólkemlestirilgen bolıp, jergilikli xalıq tiykarınan sharwashılıq penen shuǵıllanadı.

Ótkerilgen ushırasıw dawamında puqaralar tiykarınan jol qurılısı, jer maydanın ajıratıw, baylanıs xızmeti, turaq jay, bilimlendiriw, mektepke shekemgi bilimlendiriw, medicinalıq hám kommunallıq xızmet kórsetiw sıyaqlı máselelerde múrájat etti.

Anıǵıraǵı, puqaralardıń 40 tan aslam múrájatı tıńlanıp, sonnan 20 ǵa jaqın múrájat sol jerdiń ózinde sheshimin taptı. Qosımsha úyreniw hám waqıt talap etetuǵın múrájatlar boyınsha tiyisli ministrlik, mákeme hám shólkemlerdiń basshılarına anıq tapsırmalar belgilep berildi.

Sonıń menen birge, awıl puqaralar jıyınındaǵı kem támiyinlengen shańaraqlarǵa televizor, gilem, azıq-awqat ónimleri, al, 33-sanlı mektep jámáátine hár qıylı atamadaǵı 100 dana ádebiy kitap, jańa parta hám taxtalar da berildi.