Prezident Moynaq rayonında Qaraqalpaqstan belsendileri menen sáwbetlesiw ótkerdi

Prezident SHavkat Mirziyoev Moynaq rayonındaǵı mádeniyat orayında qaraqalpaqstanlı belsendiler menen sáwbetlesiw ótkerdi.

 

Mámleketimiz basshısı jıynalǵanlardı jaqınlasıp kiyatırǵan Ǵárezsizlik bayramı menen qutlıqlap, qaraqalpaq eline shın júrekten húrmet-izzetin bildirdi.

– Sizler menen birgelikte úlken háreket basladıq. Hár bir aymaqtıń dártin bileyik, hár bir insannıń ishine kireyik, erteńgi kúnge isenimin oyatayıq dep tereń oylanǵan reformalardı ámelge asırıp atırmız. Admlar erteń emes, alıs keleshekte emes, búgin jaqsı jasawı kerek, – dedi Prezident.

Bul siyasattıń nátiyjesi Qaraqalpaqstanda da ayqın kórinbekte.

Aral boyı xalqınıń turmısın jaqsılaw haqqındaǵı gápler 50-jıllardan berli bar. Biraq, sońǵı eki jılda islengen jumıslar óz aldına.

SHavkat Mirziyoevtiń baslaması menen BMSH basshılıǵında Aral boyı aymaǵı ushın kóp sheriklik tiykarındaǵı Trast fondı dúzildi. Ózbekstan Respublikası Prezidenti janında Aral boyı xalıqaralıq innovaciyalıq orayı, Aral boyında innovaciyalardı qollap-quwatlaw qorı shólkemlestirildi. Teńizdiń qurıǵan ultanında qorǵaw toǵaylıqları, Ámiwdárya deltasında kishi suw basseynleri payda etilmekte.

Mámleketimiz basshısınıń 2017-jıl 28-fevraldaǵı qararına muwapıq Moynaq rayonın sociallıq-ekonomikalıq jaqtan rawajlandırıw hám xalıqtıń bántligin támiyinlew boyınsha da bir qatar jumıslar ámelge asırıldı.

Prezidentimizdiń ótken jılı 15-noyabrdegi saparı dawamında belgilengen wazıypalar tiykarında húkimetlik baǵdarlama qabıl etildi. Rayon orayında mámleketlik xızmetler orayı, amfiteatr, basseyn, sport zalı, muzıka hám kórkem óner mektebi, medicinalıq oray hám basqa obektler qurıldı. 20 kóp etajlı turaq jay qurılmaqta.

SHın júrekten bolıp ótken ushırasıwda Nókis qalası hám barlıq rayonlardan kelgen wákiller Moynaqtaǵı ózgerislerge háwes etkenligin atap ótip, óz orınlarındaǵı kemshilik hám áhmiyetli máselelerdi ayttı. Olardı sheshiw boyınsha juwapkerlerge tapsırmalar berildi.

– Záwlim imaratlar, zamanagóy texnikalar menen maqtanıw shárt emes. Aqıllı, bilimli, pidayı perzentlerdi tárbiyalasaq hám olar Watanǵa xızmet etse, eń úlken baylıq, baxıt usı, – dedi mámleketimiz basshısı.