Joqarǵı Keńes deputatları

Qaraqalpaqstan Respublikası Joqarǵı Keńesine saylanǵan hám Qaraqalpaqstan Respublikası «Saylaw haqqında»ǵı  Nızamına muwapıq Qaraqalpaqstan Respublikası Oraylıq saylaw komissiyası tárepinen dizimge alınǵan Ózbekstan Respublikası puqarası deputat bolıp esaplanadı.
Deputat Joqarǵı Keńestiń wákillik múddetine saylanadı.
Deputat Joqarǵı Keńestiń sessiyasında qaralıp atırǵan barlıq máseleler boyınsha sheshiwshi dawıs huqıqınan paydalanadı.
Deputat:
– Joqarǵı Keńestiń komitetleri hám komissiyalarına saylaw hám saylanıwǵa;
– Joqarǵı Keńestiń sessiyalarında qarap shıǵıw ushın máseleler usınıwǵa;
– Joqarǵı Keńes sessiyasınıń kún tártibi, dodalanıp atırǵan máselelerdi qarap shıǵıw tártibi hám bul máselelerdiń áhmiyeti boyınsha usınıslar kirgiziw hám pikir bildiriwge;
– qarar joybarları hám olarǵa dúzetiwler kirgiziwge;
– Joqarǵı Keńes tárepinen dúziletuǵın komitetlerdiń hám komissiyalardıń jeke quramı hám saylanatuǵın, tayınlanatuǵın yamasa tastıyıqlanatuǵın lawazımlı shaxslardıń kandidaturaları boyınsha pikir bildiriwge;
– dodalawda qatnasıwǵa, bayanatshı hám basqarıwshıǵa sorawlar beriwge;
– deputat sorawı menen múrájat etiwge;
– óz usınısların tiykarlap beriw ushın sózge shıǵıwǵa hám dawıs beriw sebepleri boyınsha túsinik beriwge;
– Joqarǵı Keńes sessiyasın basqarıwshıǵa dodalanıp atırǵan másele boyınsha óz sózi, usınısı yamasa pikiriniń tekstin tapsırıwǵa;
– ózi aǵza bolǵan Joqarǵı Keńes komitetleriniń hám komissiyalarınıń qararına qosılmaǵan jaǵdayda óz kóz-qarasın sessiya májilisinde bayan etiwge yamasa bul haqqında Joqarǵı Keńes Baslıǵına jazba ráwishte bildiriwge;
– respublikanı rawajlandırıw baǵdarlamalarınıń orınlanıwı ústinen qadaǵalawdı ámelge asırıwǵa;
– Joqarǵı Keńeske esap beriwshi yamasa onıń qadaǵalawı astındaǵı hár qanday uyım yamasa lawazımlı shaxstıń esabatı yaki málimlemesin sessiya májilislerinde tıńlaw haqqında usınıs kirgiziwge;
– Ózbekstan hám Qaraqalpaqstan Respublikası Nızamlarınıń orınlanıwı, sonday-aq, Joqarǵı Keńes qararlarınıń orınlanıwın tekseriw haqqında qarap shıǵıw ushın máseleler kirgiziwge;
– sessiya májilisleriniń stenogrammaları menen tanısıwǵa;
– puqaralardıń huqıqları hám nızam menen qorǵalatuǵın máplerin buzıw jaǵdayları yamasa nızam hújjetlerin buzıwdıń basqa jaǵdayları anıqlanǵan jaǵdayda olarǵa shek qoyıw sharaların kóriw talabı menen tiyisli uyımlarǵa hám lawazımlı shaxslarǵa múrájat etiwge haqılı.

Joqarǵı Keńes deputatları