Qoraqalpog’iston Respublikasi Jo’qorg’i Kengesi deputatlari

Qoraqalpog’iston Respublikasi Jo’qorg’i Kengesiga saylangan va Qoraqalpog’iston Respublikasi «Caylov to’g’risida»gi Qonuniga muvofiq Qoraqalpog’iston Respublikasi Markaziy saylov komissiyasi tomonidan ro’yxatga olingan O’zbekiston Respublikasi fuqarosi deputat bo’lib hisoblanadi.Deputat Jo’qorg’i Kengesning vakolat muddatiga saylanadi.

Jo’qorg’i Kengesning deputatlari Jo’qorg’i Kengesda doimiy asosda ishlashi mumkin hamda o’z vakolatlari davrida ilmiy va pedagogik faoliyatdan tashqari haq to’lanadigan boshqa turdagi faoliyat bilan shug’ullanishlari mumkin emas.

Deputat Jo’qorg’i Kengesning sessiyasida ko’rib chiqilayotgan barcha masalalar bo’yicha hal qiluvchi ovoz huquqidan foydalanadi.

Deputat:

– Jo’qorg’i Kengesning qo’mitalari va komissiyalariga saylash va saylanishga;

– Jo’qorg’i Kengesning sessiyalarida ko’rib chiqilishi uchun masalalar taklif etishga;

– Jo’qorg’i Kenges sessiyasining kun tartibi, muhokama qilinayotgan masalalarni ko’rib chiqish tartibi hamda bu masalalarning mohiyati yuzasidan takliflar kiritish va mulohazalar bildirishga;

– qaror loyihalari va ularga tuzatishlar kiritishga;

– Jo’qorg’i Kenges tomonidan tuziladigan qo’mitalarning va komissiyalarning yakka tarkibi va saylanadigan, tayinlanadigan yoki tasdiqlanadigan lavozimli shaxslarning nomzodlari bo’yicha fikr bildirishga;

– munozaralarda ishtirok etishga, ma’ruzachi va raislik qiluvchiga savollar berishga;

– deputat so’rovi bilan murojaat etishga;

– o’z takliflarini asoslab berish uchun so’zga chiqishga va ovoz berish sabablari yuzasidan izoh berishga;

– Jo’qorg’i Kenges sessiyasida raislik qiluvchiga muhokama qilinayotgan masala yuzasidan o’z nutqi, taklifi yoki mulohazasi matnini topshirishga;

– o’zi a’zo bo’lgan Jo’qorg’i Kenges qo’mitalarining va komissiyalarining qaroriga qo’shilmagan taqdirda o’z nuqtai nazarini sessiya majlisida bayon etishga yoki bu haqda Jo’qorg’i Kenges Raisiga yozma ravishda ma’lum qilishga;

– Jo’qorg’i Kengesga hisobdor yoki uning nazorati ostidagi har qanday organ yoxud mansabdor shaxsning hisoboti yoki axborotini sessiya majlislarida eshitish to’g’risida taklif kiritishga;

– O’zbekiston va Qoraqalpog’iston Respublikasi Qonunlarining ijro etilishini, shuningdek, Jo’qorg’i Kenges qarorlarining bajarilishini tekshirish to’g’risida ko’rib chiqish uchun masalalar taklif etishga;

– sessiya majlislarining stenogrammalari bilan tanishishga;

– fuqarolarning huquqlari va qonun bilan muhofaza qilinadigan manfaatlarini buzish hollari yoki qonun hujjatlarini buzishning boshqa hollari ma’lum bo’lib qolgan taqdirda ularga darhol chek qo’yish choralarini ko’rish talabi bilan tegishli organlarga hamda mansabdor shaxslarga murojaat etishga haqli.