O'zbekiston Respublikasi Prezidenti Shavkat Mirziyoev 27 aprel kuni Toshkent xalqaro investitsiya forumi doirasida Islom taraqqiyot banki prezidenti Muhammad bin Sulaymon al-Jassirni, Qirg'iz Respublikasi Vazirlar Mahkamasi Raisi – Prezident Administratsiyasi rahbari Aqilbek Japarovni, Birlashgan Arab Amirliklari energetika va infratuzilma vaziri Suxayl al-Mazruiyni, Vengriya iqtisodiy rivojlanish vaziri Marton Nadni, Saudiyaning “ACWA Power” kompaniyasi boshqaruvi raisi Muhammad Abdulla Abunayyan va BMT Bosh kotibining o'rinbosari, Evropa iqtisodiy komissiyasi (EIK) Ijrochi kotibi Olga Algaerovani qabul qildi.
Islom taraqqiyot banki prezidenti Muhammad bin Sulaymon al-Jassir bilan yangi o'rta muddatli sheriklik dasturi doirasida Bank guruhi bilan keng ko'lamli hamkorlikni yanada kengaytirish masalalari muhokama qilindi.
Bugungi kunda qo'shma loyihalar portfeli iqtisodiyotning ustuvor tarmoqlarini qamrab olgan holda 1,3 milliard dollardan oshgani mamnuniyat bilan qayd etildi. Forum doirasida qishloq va transport infratuzilmasini modernizatsiya qilish, maktabgacha ta'limni rivojlantirish bo'yicha loyihalarni amalga oshirish yuzasidan umumiy qiymati 400 million dollarlik bitimlar imzolandi.
Uchrashuvda amaliy hamkorlikni rivojlantirish, tadbirkorlik va xususiy investitsiyalarni qo'llab-quvvatlash, moliyaviy vositalarni takomillashtirish, Bank tuzilmalarini loyiha ishlariga faol jalb qilish borasida aniq loyihalarni ilgari surish, shuningdek, mamlakatimizning JSTga qo'shilishi va innovatsion ekotizimni yaratish masalalarida texnik ko'makni kengaytirishga alohida e’tibor qaratildi.
Qirg'iz Respublikasi Vazirlar Mahkamasi Raisi – Prezident Administratsiyasi rahbari Aqilbek Japarov bilan uchrashuvda O'zbekiston-Qirg'iziston ko'p qirrali hamkorligiga oid amaliy jihatlar muhokama qilindi.
Ikki tomonlama munosabatlarning bugungi yuksak darajasi mamnuniyat bilan qayd etildi. Jadal muloqotlar davom ettirilmoqda, muhim iqtisodiy loyihalar va gumanitar dasturlar amalga oshirilmoqda.
Yaqinda O'sh shahrida Zahiriddin Muhammad Bobur nomidagi teatrning yangilangan binosi tantanali ochildi, Qo'qon shahrida esa sportchilarning spartakiadasi muvaffaqiyatli o'tkazildi. Hududlar forumi va Avlodlar uchrashuvini o'tkazishga puxta tayyorgarlik ko'rilmoqda.
Davlatimiz rahbari avtomobilsozlik, energetika, transport infratuzilmasi, poytaxtlarda savdo uylarini ochish bo'yicha kooperatsiya loyihalarini tezlashtirish zarurligini ta'kidladi.
Birlashgan Arab Amirliklari energetika va infratuzilma vaziri Suxayl al-Mazruiy bilan uchrashuvda O'zbekiston-BAA ko'p qirrali hamkorligi doirasidagi loyihalarni ilgari surish masalalari ko'rib chiqildi.
Muzokaralar avvalida vazir al-Mazruiy davlatimiz rahbariga Prezident Shayx Muhammad Ol Nahayon va Vitse-prezident, Bosh vazir, Dubay Amiri Shayx Muhammad Ol Maktumning salomini etkazdi.
Ikki tomonlama munosabatlar rivojining bugungi yuqori sur’ati katta mamnuniyat bilan qayd etildi.
Keyingi bir necha yilda tovar ayirboshlash ikki barobar oshdi, 50 ta yangi korxona tashkil etildi, investitsiya loyihalari portfeli 3 milliard dollardan ortdi. Qo'shma investitsiya kompaniyasi muvaffaqiyatli faoliyat yuritmoqda.
Bo'lajak oliy darajadagi uchrashuvlarga tayyorgarlik ko'rish va ularni aniq mazmun bilan boyitish maqsadida O'zbekiston etakchisi “yashil” iqtisodiyot, energetika, transport va logistika, qishloq xo'jaligi, infratuzilma va boshqa ustuvor yo'nalishlarda istiqbolli loyihalarni ilgari surish muhimligini ta'kidladi.
Vengriya iqtisodiy rivojlanish vaziri Marton Nad bilan uchrashuvda ikki mamlakat o'rtasidagi savdo-iqtisodiy hamkorlikni yanada rivojlantirishning birinchi galdagi chora-tadbirlari muhokama qilindi.
Tadbirkorlar va hududlar darajasidagi kooperatsiyani tubdan kengaytirishga alohida e’tibor qaratildi.
Yaqin oylarda to'g'ridan-to'g'ri aviaqatnovlarni yo'lga qo'yish, chuqurlashgan sanoat kooperatsiyasi uchun mo'ljallangan tuzilma shartlarini tez fursatda kelishish va faoliyatini boshlash muhim ekani ta'kidlandi.
Qishloq xo'jaligi, farmatsevtika, transport va kommunikatsiyalar, samarali moliyaviy vositalarni yaratish borasidagi loyihalarni tayyorlash va amalga oshirish ishlarini tezlashtirishga kelishib olindi.
Saudiyaning “ACWA Power” kompaniyasi boshqaruvi raisi Muhammad Abdulla Abunayyan bilan uchrashuvda bilan o'tkazgan uchrashuvda joriy loyihalarni amalga oshirish masalalari va sheriklikni tubdan kengaytirish imkoniyatlari ko'rib chiqildi.
Davlatimiz rahbari O'zbekistonning “yashil” energetika tarmog'i rivojiga eng ko'p sarmoya kiritayotgan ushbu kompaniya bilan hamkorlik sermahsul bo'layotganini mamnuniyat bilan qayd etdi.
Bugungi kunda muqobil energetika sohasida 7,5 milliard dollarlik loyihalar amalga oshirilmoqda. Bundan tashqari, quyosh va shamol elektr stantsiyalarini qurish, “yashil” vodorod ishlab chiqarish bo'yicha yangi loyihalar faol tayyorlanmoqda.
Suhbat chog'ida kooperatsiyani yanada chuqurlashtirish, birinchi navbatda innovatsion loyihalarni, shu jumladan O'zbekiston-Saudiya Ishbilarmonlar kengashi doirasida ilgari surish istiqbollari muhokama qilindi.
BMT Bosh kotibining o'rinbosari, Evropa iqtisodiy komissiyasi (EIK) Ijrochi kotibi Olga Algaerova bilan uchrashuvda Barqaror rivojlanish maqsadlariga tezkor erishish borasida BMT institutlari, shu jumladan EIK bilan ko'p qirrali hamkorlikni rivojlantirish masalalari ko'rib chiqildi.
Markaziy Osiyo mintaqasi mamlakatlari uchun maxsus dastur doirasida samarali hamkorlik qilinayotgani mamnuniyat bilan qayd etildi. Tomonlar O'zbekistonning Jahon savdo tashkilotiga a'zo bo'lishi hamda “Yashil makon” dasturini, yuk tashishlarni raqamlashtirish va to'qimachilik sanoati loyihalarini amalga oshirish masalalarida almashinuvlarni davom ettirishdan manfaatdor ekanini ta'kidladi.
Suhbatda BMT EIK bilan ustuvor yo'nalishlarda hamkorlikni yanada kengaytirish masalalari ham muhokama qilindi.
